+ In nomine Domini. Vicesimo quinto anno principatus domni nostri Gisulfi gloriosi principis, mense octubri quinta indictione. Ante me Petrum iudicem Andreas liber homo coniunctus est cum Desideo filio quondam Romoaldi qui postmodum monachus fuit, et per ipsum Andream ostensa est una cartula scripta per Petrum notarium vicesimo primo anno principatus suprascripta domni nostri Gisulfi gloriosi principis, mense ianuario prima indictione. Qualiter ante meam presentiam ipse Desideus et Grusa uxor eius filia quondam Leonis Atrianensis secundum legem, per ipsam cartulam venumdederant ipsi Andeee integram terram illorum in qua ipse Andreas potegam de lignamina constructam habebat, quam olim Martinus faber erarius filius quondam Iohannis ab eorum parte retinuerat, per fines et mensuras iusto pede manus hominis mensuratas foris portam que Rotensis dicitur: a parte occidentis finis aliorum; a parte meridiei finis muri istius civitatis, inde erant pedes quattuordecim et planta cum pollice; a septemtrione finis via que ducit ad ipsam portam et iuxta eam mensurati pedes tredecim minus planta, et per longitudinem ab ipsa parte occidentis a predicto muro usque ipsam viam; a parte orientis finis turrim que prima est ab ipsa porta et qualiter recte vadit usque ipsam viam; cum omnibus que intra eam erant cunctisque eius pertinentiis et cum vice de ipsa via, ut semper esset in potestate ipsius Andree et heredum eius, et liceret illum et eius heredes de eo facere quod volerent sicut ipsa cartula continet, in qua ego meum nomen propriis subscripseram digitis. Cum autem suprascripta cartula ostensa atque perlecta fuit, sicut ipsi Andeee congruum fuit, sua voluntate, per hanc cartulam tradidit ipsi Desideo integram suprascriptam terram per iamdictas fines et mensuras qualiter eam ille et iamdicta Grusa uxor eius eadem Andree sicut suprascripta cartula continet venumdederant, cum omnibus que intra eam sunt cunctisque eius pertinentiis et cum integra ipsa vice de predicta via, et ipse Andreas nichil sibi exinde remanere dixit. ea ratione ut integra ipsa traditio qualiter prescriptum est sit semper in potestate ipsius Desidei et heredum eius, et liceat illum et heredes eius de eo facere quod voluerint. et propter confirmationem huius traditionis ipse Andreas suscepit ab ipso Desideo statutum pretium auri tarenos bonos centum quattuor in omni deliveratione. et per convenientiam ipse Andreas guadiam ipsi (Desi)deo dedit et fideiussorem ei posuit se ipsum, et per ipsam guadiam obligavit se et suos heredes semper defendere ipsi Desideo et illius heredibus integrum illud quod ei ut suprascriptum est tradidit ab omnibus hominibus, quibus per ipsum Andream et eius heredes illud vel ex ipso quomodocumque datum aut obligatum vel manifestatum seu alienatum paruerit et qui pro illorum parte et dato quascumque causationes de eo ipsi Desideo et illius heredibus preposuerint; ab aliis autem hominibus et cum voluerint ab omnibus hominibus ipse Desideus et eius heredes potestatem habeant illud per se defendere qualiter voluerint cum omnibus muniminibus et rationibus quas de eo ostenderint. verumtamen quoniam et cum suprascripta traditione tradidit ipsi Desideo suprascriptam cartulam ad faciendum de ea ipse Desideus et eius heredes quod voluerint. et si sicut superius scriptum est ipse Andreas et eius heredes ipsi Desideo et illius heredibus non adimpleverint et suprascripta vel ex eis quicquam removere aut contradicere presumpserint, per ipsam guadiam obligavit se et suos heredes componere ipsi Desideo et illius heredibus quinquaginta auri solidos constantinatos et sicut superius scriptum est adimplere. Et taliter te Ademarium notarium scribere precepi. S. + Ego qui supra Petrus iudex. S.

Source Fulltext: Codex Diplomaticus Cavensis, vol. 09, 65-67, Estratto da ALIM