+ In nomine Domini. Vicesimo sexto anno principatus domni nostri Gisulfi gloriosi principis, mense ianuario sexta indictione. Ante me Petrum iudicem Mascinus clericus filius quondam Romoaldi coniunctus est cum Petro Atrianensi filio quondam Iohannis Atrianensis qui cognominatus est Granita et cum Blacta uxore illius filia quondam Sergii Atrianensis, et per ipsum Mascinum ostensa est una cartula. De vicesimo secundo anno principatus suprascripti domni nostri Gisulfi gloriosi principis, mense ianuario secunda indictione. Qualiter ante Petrum iudicem Risus clericus filius quondam Iaquinti clerici et medici coniunctus fuerat cum ipso Mascino clerico filio memorati Romoaldi, et ipse Risus clarificaverat se habere terram cum vinea et canneto foris hac civitate in loco Transboneia, quam dixerat esse per fines et mensuras iusto passu hominis mensuratas: a parte meridiei finis media sepes et prope eam intra ipsam terram recte mensurati passus quinquaginta et quattuor; a parte occidentis finis medio vallone qui discernebat inter ipsam terram et terram monasterii Sancte Marie de Uliaria, et recte intra ipsam terram mensurati prope ipsam finem passus octoginta; a parte septemtrionis finis mediam sepem et prope eam intra ipsam terram mensurati recte passus quadraginta; a parte orientis finis viam publicam que ducebat ad mare, et per eam mensurati passus quinquaginta. et sicut ipsi Riso congruum fuerat, sua voluntate, per ipsam cartulam venumdederat ipsi Mascino integram ipsam terram per suprascriptas fines et mensuras, cum omnibus que intro eam erant cunctisque eius pertinentiis et cum vice de ipsa via et cum integro eo quod extra suprascriptas mensuras ibique coniunctum eidem Riso pertiriuerat. ea ratione ut semper fieret in potestate ipsius Mascini et heredum eius et liceret illum et eius heredes de eo facere quod volerent sicut ipsa cartula continet, in qua ipse Petrus iudex subscriptus est. Cum autem ipsa cartula fuit ostensa, ipsi Petrus et Blacta, sicut eis congruum fuit, bona eorum voluntate, per convenientiam, per hanc cartulam manifestaverunt ipsi Mascino de tota et integra suprascripta terra cum vinea et canneto per iamdictas fines et mensuras suprascripto iusto passu hominis mensurata, que a parte ipsa septemtrionis coniuncta est ad alteram terram ipsius Mascini pertinentem, et de toto et integro eo quod ipsi Mascino venumdatum fuit ab ipso Riso clerico sicut suprascripta cartula continet, cum omnibus que intro illud sunt omnibusque suis pertinentiis et cum vice de ipsa via. ea ratione ut semper sit in potestate ipsius Mascini et heredum eius et liceat illum et eius heredes de eo facere quod voluerint absque contrarietate ipsorum Petri et Blacte et heredum eorum. et per convenientiam ipsi Petrus et Blacta guadiam ipsi Mascino dederunt et fideiussorem ei posuerunt Maurum Atrianensem filium quondam Iohannis Atrianensis qui dicebatur de Lupeno. et per ipsam guadiam obligaverunt se et suos heredes semper defendere ipsi Mascino et eius heredibus integrum illud de quo ei manifestaverunt sicut suprascriptum est ab omnibus hominibus, quibus per ipsos Petrum et Blactam et per eorum heredes illud vel ex ipso datum vel obligatum seu manifestatum aut alio quocumque modum alienatum paruerit et quibus pro parte et dato eorum et heredum eorum quascumque causationes de eo ipsi Mascino et heredum eius quascumque causationes de eo ipsi Mascino et illius heredibus preposuerint; et tribuerunt ei licentiam ut cum voluerint ab omnibus hominibus potestatem habeant illud per se defendere qualiter voluerint ipse Mascinus et suos heredes cum omnibus monuminibus et rationibus quas de eo ostenderint. et si sicut superius scriptum est ipsi Petrus et Blacta et eorum heredes ipsi Mascino et eius heredibus non adimpleverint et suprascripta vel ex eis quicquam removere aut contradicere presumpserint, per ipsam guadiam obligaverunt se et suos heredes componere ipsi Mascino et eius heredibus centum auri solidos constantinatos et in suprascripta manifestatione sicut suprascriptum est semper firmiter permanere et sicut superius scriptum est adimplere. suprascripta vero fecit ipsa Blacta secundum legem et Romanorum consuetudinem. quod autem superius inter virgulos scriptum est legitur terra; et quod disturvatum paruerit legitur in uno loco ipsam terram, in altero illud, in cetero dicit grum. verumtamen quoniam ipsa cartula scripta est per Grimoaldum notarium. Et taliter tibi Iohanni notario scribere precepi. S. + Ego qui supra Petrus iudex. S.

Source Fulltext: Codex Diplomaticus Cavensis, vol. 09, 132-134, Estratto da ALIM