+ In nomine Domini. Vicesimo octabo anno principatus domni nostri Gisulphi gloriosi principis, mense februario octaba indictione. Dum coram presentia domni Leonis venerabilis abbatis monasteriorum Sanctæ et inseparabilis Trinitatis, quod constructum est foris hanc Salernitanam civitatem in loco Metiliano, et Beati Nicolai, quod conditum est intra hanc civitatem in plaia montis ubi a la Palma dicitur, essem ego Petrus iudex et ydonei homines, tunc in eandem presentia Iohannes monachus per iussionem suprascripti domni abbatis, pro parte ipsius monasterii Sancti Nicolai, per convenientiam tradidit Iohannacio qui vocatur Argussa filio quondam Iohannis integrum solarium de casa fabricata, que est intra hanc civitatem prope casis que fuerunt heredum cuiusdam Gaidonis iudicis, et integram medietatem de catodeo ipsius case et de clibano qui intra ipsum catodeum est et de omnibus hordinibus ipsius clibani; necnon et tradidit ipsi Iohannacio integram medietatem de omnibus rebus stabilibus quas in ipso monasterio Sancti Nicolai pertinet habere foris ac civitatem in loco Propiciano et per fines et vocabula et pertinentias ipsius loci per datum Stephani qui dicitur de Dumnanda filii Iohannis et per datum Dumnande uxoris eius cum vice de viis suis; et ipsa terra cum casa fabricata pertinet in ipso monasterio Sancti Nicolai per datum suprascripti Iohannaci et Aloare uxoris eius. ea ratione ut amodo et dum ipse Iohannacius vixerit integra suprascripta traditio cum vice de platea que cum suprascripta casa coniuncta est sua potestate teneat et omnes suas utilitates iusta ratione ibi faciat et in ipsum solarium ipsius case si voluerit habitet vel aliis hominibus illum ad habitandum tribuat dum vixerit, et tributum quod ex eo tollere potuerit sibi illum habeat et ex eo quod voluerit faciat et quicquid in ipso solario conciandi necessum fuerit ipse Iohannacius illud conciare faciat bonum quando meruerit et coperire illum faciat qualiter et quando meruerit; et ipsum clibanum communiter hordinent pars ipsius monasterii et iamdictus Iohannacius quomodo melius potuerint, et de comuni expendio dent et faciant omnia que pro ipso clibano rationabiliter dare vel facere necessarium fuerit, et de toto pane, quod furnaticum pro ipso clibano datum fuerit, medietatem tollat pars ipsius monasterii Sancti Nicolai et medietatem ipse Iohannacius accipiat. similiter et de omne vino quod ex ipsis rebus exierit et de tota alia frudia ipsarum rerum medietatem tollat pars ipsius monasterii Sancti Nicolai et medietatem tollat ipse Iohannacius, sic tamen ut coloni ipsarum rerum tollant ex ipso vino et frudia portionem suam. et per convenientiam ipse Iohannes monachus per iussionem suprascripti domni abbatis guadiam ipsi Iohannacio dedit et fideiussorem ei posuit Ursum qui cognominatur Caccabellu filium quondam Sergii Atrianensis, et per ipsam guadiam ipse domnus abbas obligavit se et successores suos et partes suprascripti monasterii Sancti Nicolai defendere ipsi Iohannacio dum vixerit integram ipsam traditionem in iamdicta ratione ab omnibus hominibus; ad hobitum vero ipsius Iohannacii inclita suprascripta traditio perveniat in potestate partibus ipsius monasterii ad faciendum ex ea quod voluerit, et heredes ipsius Iohannacii et homines quos ibi miserit liceat ex ea abstraere omnes res suas et ducere eas quo voluerint. et si sicut superius scriptum est ipse domnus abbas et successores eius et pars ipsius monasterii Sancti Nicolai ipsi Iohannacio non adimpleverint et suprascripta vel ex eis quicquam remobere aut contradicere presumpserint, per ipsam guadiam ipse domnus abbas obligavit se et successores eius et partes suprascripti monasterii componere ipsi Iohannacio viginti auri solidos constantinatos. verumtamen hoc memoramus quoniam ipse Iohannes monachus non tradidit ipsi Iannacio totum ipsum solarium de suprascripta casa nisi medietatem ex eo, et de totis suprascriptis rebus foris hac civitate non amplius ipsi Iannacio tradidit nisi quartam partem, et ipse Iannacius quartam partem percipiat de prascriptis frudiis suprascriptarum rerum extra portionem laboraturum. Et taliter tibi Iohanni notario scribere precepi. S.

Source Fulltext: Codex Diplomaticus Cavensis, vol. 09, 251-253, Estratto da ALIM