+ In nomine domini Dei eterni et salvatoris nostri Iesu Christi. Anno ab incarnatione eius millesimo octogesimo, temporibus domini nostri Robberti gloriosissimi ducis, mense augusto concurrente indictione tertia. Ante me Iohannem iudicem Vivus vicecomes filius quondam Petri et Romana uxor eius filia quondam Cleni Alamanni clarificaverunt sibi pertinere terram cum casis fabricatis tectis ex tribus cameris intra hanc Salernitanam civitatem ubi a la Palma dicitur prope monasterium Sancti Nykolai, quam dixerunt esse per fines: a parte septemtrionis finis via puplica que ducit ad portam huius civitatis que ibi propinquo est; a parte orientis finis terra cum casa quam ipse Vivus coram me dedit Girardo et Gaite filiis suis naturalibus, sicut totus paries fabricatus ipsarum casarum discernit; a parte meridiei finis anditum et finis media extrectola; a parte occidentis finis alia terra cum casa fabricata illorum, sicut medius paries fabricatus discernit. et clarificaverunt habere edificium super ipsam viam per latitudinem quantum ipsa via ibi est, et per longitudinem quantum ipse case cum ipsis cameris retinent, et a parte ipsa septemtrionali coniunctum esse cum aliis terris cum casis ipsorum. et sicut ipsis Vivo et Romane congruum fuit, bona illorum voluntate per convenientiam, per hanc cartulam tradiderunt Gualterio filio naturalis ipsius Vivi integram suprascriptam terram cum casis et tribus cameris per iamdictas fines et totum ipsum edificium qualiter constructum et edificatum est, et integram terram cum arbusto et vinea de loco Transboneia prope ecclesia Sancte Marie pertinentie illorum, quam dixerunt esse per fines et mensuras iusto passu hominis mensuratas: a parte meridiei finis via et passus viginti octo; a parte orientis finis illorum et finis aliorum, sicut media sepes discernit et intra ipsam terram prope eam recte mensurati passus sexaginta octo; a parte septemtrionis similiter finis illorum et passus sexaginta quinque minus cubitum, et abinde vadit per viam illorum que in predictam terram ducit, passum unum et cubitum; a parte occidentis finis aliorum sicut media sepes discernit et secus eam intra ipsam terram mensurati passus viginti octo; cum omnibus que intra ipsas terram cum casis et edificio et intra suprascriptam terram per suprascriptas fines et mensuras sunt cunctisque suis pertinentiis et cum vice de ipsis viis et de ipso andito. ipse Vivus tradidit ex eo tres partes et ipsa Romana quartam partem, ea ratione ut semper sit in potestate ipsius Gualterii et liceat illum ex eo facere quod voluerit; tantum ipsi vir et uxor dum vixerint integram suprascriptam traditionem sue potestati retineant usufruendi nomine et de usufructu eius quod voluerint faciant; post illorum vero obitum ipse ususfructus ad suam redeat proprietatem. et per convenientiam ipsi vir et uxor obligaverunt se et suos heredes semper defendere ipsi Gualterio integrum illud quod ei sicut suprascriptum est tradiderunt ab omnibus hominibus in suprascripta ratione, et tribuerunt ei licentiam ut, quando ipse Gualterius voluerit, potestatem habeat illud per se defendere qualiter voluerint cum omnibus muniminibus et rationibus quas de eo ostenderit. et si sicut superius scriptum est ipsi vir et uxor et illorum heredes ipsi Gualterio non adimpleverint et suprascripta vel ex eis quicquam remobere aut contradicere presumpserint, per convenientiam obligaverunt se et suos heredes componere ipsi Gualterio centum auri solidos constantinatos et sicut suprascriptum est adimplere. verumtamen quoniam suprascriptam terram cum arbusto et vinea dixerunt esse in suprascripto loco Transboneia ubi Maianum dicitur et intra eam casas fabricatas habere, et ipse case non essent ex tribus cameris tecte nisi ex duabus et ostraco, et ipsum edificium tantum esse per longitudinem quantum ipse case cum ipsis duabus cameris et ostraco iuxta ipsam viam retinent. suprascripta fecit ipsa Romana cum voluntate suprascripti viri sui. Et taliter tibi Iohanni notario scribere precepi. S. + Ego qui super Iohannes iudex.

Source Fulltext: Codex Diplomaticus Cavensis, vol. 10, 337-339, Estratto da ALIM