Wij Jacob van Lichtenberch, proest der kerken van sinte Peter tUtrecht, doen kond ende kenlic allen luden, dat wij gesien, gehoirt hebben, ende in onse tegenwoerdicheyt collacioniert zijn zekere brieue des hogeboirne vorsten ende mogenden pryncen heren Phylips, hertoghe van Bourgon. &c, ongerasiert, ongecancelliert, gans ende gaue ende

well besegeit mitten groten segel sijnre mogentheden, alsoe dat scheen ende wij beken nen mochten ende conden, sprekende van woirde te woirde als hier nae bescreuen

Philips, bijder gracien Goids hertoge van Bourgon., van Lothr., van Brabant ende van Lymborch, graue van Vlaenderen, van Arthois, van Bourgon., palatijn van Hene gouwen, van Hollant, van Zeelant ende van Namen, marcgraue des heyligen rijcx, heer van Vrieslant, van Salins ende van Mechelen, doen cond allen luyden, hoe dat waer is, dat tot anderen tijden hier te voren tusschen ons mit onsen lande van Hollant ende van Zeelant, aen die een sijde, ende onsen neue den bisscop van Vtrecht mit zijnen alingen ghestichte van Vtrecht, an dander sijde, een ganse zoene ende pays gemaect is geweest bij onser beyder raide ende vriende, dair toe geordineert vter machte endejnden name van ons, ouermyds zekere twijdrachten ende discorde wille, die tusschen ons ende onsen lande aen beyden sijdcn op die tijt stonden, tot welker zoene, zeder dat de eerst volgaen ende gesloten was, wij altijts mit goider meynynge genegen hebben geweest ende noch sijn om die tonderhoudcn ende volcomelic te voldoen ende doen voldoen in allen punten ende voirwairden daer yn begrepen, sonder dair tegen te gaen in enyger- wijs, gelijc als wij dat wael schijnbairlic bewcsen hebben ende doen bewisen bij onsen dieneren ende officieren ouer all van onsen landen tot alretijt, als des van ons versocht heefft geweest, ende hebben oick tijtlic, alst van node was ende wij dair toe verstaen mochten, onse rade ende vriende tegen den sten gestichte voirs. te daghe gesent tot zulken steden ende plaetsen, als sij begeert hebben zonder enighe onschulde dair jn te soeken, om ymmer altijts die voirs. zoene na te gaen, te vereffenen ende te verlikenen alle tgnone, dat contrarie off dair bouen ghesciet mochte wesen. Ende niet teghen- staende onse wille ende meynynge, die wij altijts gehadt hebben inden voirs. pays te volcomen, wij hebben nochtan vernomen, dat die vander stat van Vtrecht van ons ver- crijgen sekere brieuen van geleyde, gegeuen onder onse signet, dat wij gebruycken in onsen lande van Hollant ende van Zeeland, als dat sij veylich ende vry dair bij zouden mogen varen ende keren duer onse voirs. lande, om hoir coopmanscip te doen nv in deser toecomender marct van onser stede van Antwerpen ende anders, des ons van geenen noode en dinct, ouermids dat wij die voirs. pays houden willen ende doen hou den, als voirs. is; ende en hebben dat oic tegens ons niet verscult in enighe versueke, die wij cortelic an hemluden hebben doen doen, also dat wij dair om niet gehouden en zijn, noch en willen wesen, den voirs. burgeren van Vtrecht enige vordernisse off gracie jnden onsen te doen, meer dan wij bijder voirs. soene him sculdich zijn te doen, ende die vermogen zall: ende wederseggen, affgaen ende doen te niete dair om mit desen brieue alle alsulke geleyden, veylicheit ende brieue, als sij van ons off den onsen tot desertijt toe enichsyns vercreghen mogen hebben, hoe ende jn wat manieren die gegeuen sijn, also dat wij nae die machte ende tinhoudcn vanden seluen brieuen, die kennen ende houden willen van geenre machte off wairde te wesen, ende dat voirtan dairom die voirs. onse brieue nyemande vanden jnwonenden borgeren van Vtrecht te stade off

te baten comen en zullen in enigerwijs; behoudelic dat die voirs. zoene blijuen ende wesen zall in hoirre machte, die welke wij. allen onsen amptluden, tolnaeren ende die- naeren ende anders allen onsen goeden luden ende ondersaten gebieden ende beuelen te houden; ende wair yemant ter contrarie him daer jn bewijsde, dat wouden wij aen dien verhalen, als wij nader voirs. zoene sculdich souden wesen te doen. Jn oirconde desen brieue ende onsen segell hiér an gehangen. Gegeuen in onser stat van Alrecht, vpten anderden dach in Septembri jnt jair ons heren dusent vierhondert vijff ende dertich.

Des tot enen oirconde eens rechten vidimus ende copien, soe hebbe wij Jacob van Lichtenberch, proest voirs., onse seghel aen desen brieff wt doen hangen. Geghcuen jnt jair ons heren dusent vierhondert vijf ende dertich, opten zeuendendach van Septembri.

Naiir den origineelen vidimus met aanhangend zegel, berustende in het arehief der stad Utrecht.