Jacob , bider genaden Goids hertoginne jn Beyeren, greninne van Henegouwen, van Hollant, van Zeelant, van Pontieu ende vrouwe van Vriesslant, doen condt allen luden: Want

139

onse lyeue broeder van Bourgon. beuolen heefft mit sinen brieuen onsen lieuen getruwen heren Franck van Borssel, heer tot Zulen ende tsente Mertiinsdijck, heren Phillips, heer tot Borssell ende tot Cortekene, ende Florens van Borssel, heer tot Zobborch, tguuernement van onsen landen van Hollantt, van Zeelant ende van Vriesslant, durende een zeker tijt ende termiin van achte iaren , also die selue onse lieue broeder van Bourgon. voirscr. een ruweert ende een oir is der seluer onser lande voirgenoemt; ende wair dat zake, dat onse lieue broeder van Bourgon. voirs. binnen den termiin vanden achte jaren voirseit bider onthengnisse Goids vanden leuen ter doit quame, dat onse heer Got verbieden moet, off dat hem enige zaken vp comen muchten , wair bij dat hij onse heerlichede ende lande niet regieren en soude mogen, hoe- danich die in enigerwijs gebueren muchten: so hebben wij geloefft ende gelouen mit desen brieue onsen lieuen getruwen heren Franck van Borssel voirs. te houden ende te doen hou- den van onser wegen jnden guuernement van onsen landen van Hollant, van Zeelant ende van Vriesslant, gelikerwijs ende in alre manieren als die brieue inhouden ende begripen, die hij mit heren Phillips ende Florens van Borssel sinen neuen voirs. van onsen lieuen broeder van Bourgon. voirscr. daer off hebben, durende de voirseyde achte jaren lanck, ende daren tenden tot onsen wederseggen. Jn oircunde desen brieue, bezegelt mit onsen zegle. Gegeuen jnden Hage, den xix. dach jn Januario, jnt jaer ons Heren dusent vier hondert ende dertich, naden loep van onsen houe (*).