We de rad der stad to Hildensem bekennet unde betuget openbare, dat vor uns quemen Holleman Hollemans, Cort Pichave, Hinrick Munßen unde Eggert Migge, vormunderen Eggerdes unde Hanses siner kindere Egghert Miggen, unde bekanden, dat se van dersulven kindere wegen van Hanneken, wedewe Egghert Miggen vorbenomt, der berorten kindere moder, hebben entfangen delinge unde genoigede wedderstadinge alles gudes, des densulven kinderen in rechte toborn mochte unde in der delinge so sy der benomden Hanneken togevallen unde gebleven, dat hus unde wonninge mit aller tobehoringe alße dar to hort uppe der Jacoppestraten neist Bertolt Borcherdes wonninge belegen. Hirumme so dede de vorberorden vormunderen van der benomden kindere wegen des vorschreven huses unde wonninge mit siner tobehoringe unde darto alle deß gudes, des der benomden Hanneken gekleret sy, to der sulven Hanneken unde orer erven hant in unser jegenwordicheit eyne gantze rechte vorticht. Mochte aver den erbenomden kindern hirna alße van ervetales wegene was ansterven edder vallen, des enschach van orer wegen nein vorticht, aver uns unser stadschot unde dingplicht alle jar darvan to gevende ungemynret. To bekantnisse dusser stugke hebbe wy unser stad ingesegel an dussen breff hengt, na goddes bort Veerteinhundert jar darna in de sestigesten jare, am dage sanctorum Crispini et Crispiniani martirum.