Wy brodere broder Mathias gardian, broder Hennyngh overste lesemester, broder Borcherd lesemester, broder Johan vicegardian unde de gantze sammynge des closters to Hildensem sunte Franciscus ordens bekennen openbare in dussem breve vor uns unde use nakomelinge unde alsweme, dat we uns vorplichtigen to twen ewigen memorien alle jare to holdende myt unser samynge myt vigilien unde myt myssen, de ene des mydwekens in der quatuortemper vor Winachten, de anderen des mydwekens in der quatuortempere na Pinxsten. In dussen memorien schulle we vlitliken bydden vor Hilleborghe Goltberges zele unde vor her Lotzen van Lauchau unde vor orer elderen zele unde vor al orer woldeder zele unde vor alle cristen zele unde vor al, de uth oren slechten sint vorstorven. Vor welke twe ewige memorien use procuratores schullen alle jar entfangen van dem procurator der vicarien in dem dome teyn schillie uppe sunte Johannes Baptisten dach to Myddensommer unde teyn schillie to Winachten, welker gelt gefundert is dorch Hilborge Goltberges vorscreven by den vicarien in dem dome unde wolbestelt heft. Dusse twe memorien love we vorghenanten myt usen nakomelingen truwe unde vast to holdende. Des to merer bekantnisse hebbe we unses closters ingesegel witliken henget an dussen bref in dem jare na goddes bord alzeme scref Dusent vifhundert unde dre, in des Nigen Jars avende.