Wy de mester unde olderman unde gemeinen werken des knokenhauweramptes der lutken schernen by der broder kloster bynnen Hildensem bekennen unde betugenn openbar ihn unde mith dussem breve vor uns unde unse nakomen unde idermennichlich, dath wy eynndrechtichlich upgebort unde tho fulrhe genoige entfangen hebben van der woldedigen fruwen Gertrud, Hans Steinberges zeligern nagelaten wedewen, einhundert gulden munthe, jo dre lutke punth geldes wu tho Hildensem ginge unde geve sin vor eynnen ideren gulden getalt, de wy alsofordt in unses amptes nudt, frommen unde besthe gewant unde gekart hebben. Vor welcker hundert gulden munthe wy der erbenompten wedewen unde orhen erven by uns unde unsen nakomelingen veher gulden munthe der vorgescreven weringe ewiger jerliker renthe, allejerlikes in den achte dagen Mychaelis tho betalende, vorkofft hebben, desulvigen wy unde unse nakomelinge der gedachten wedewen unde orhen mithbescrevenen schullen unde willen unbehindert unde unbekummert alles gerichts unde rechts jerlikes geven unde betalen anhe insage. Ock hefft de vorgedachte persone angesheen unde betrachtet, dath nicht wissers is wen de doeth unde nicht unwissers wen de stunde des dodes, dath se nhu nicht van dodes wegen vorsnelleth werde, ehr szodane veher gulden jerliker renthe nha orhem beger unde nha orhem dode ihn de ehre des almechtigen goddes, orhen frunden ersten unde darnegest den armen noettrofftigen thom besten bestediget werden, hefft se by orhem levendigen live mith wolberadem unde wolbedachtem mode szodane vheer gulden munthe jerliker renthe orhen broderen unde susteren unde dersulvigen orhen kinderen, alle de wile der eynn livet unde levet, unde nha der alle afstervent in de hende der noettroftigen unde rechten armen tho troste orher unde der orhen selen gegeven unde in nachbescreven tho schicken unde tho delende, szo dath wy de mester, olderlude unde werken edder unse nakomelinge, wen de ehrgenante wedewe van dem lechte dusser werlt nha dem willen gots is gesceden, dennhe mher alßodane veher gulden munthe jerliker renthe in den achte dagen Michaelis nha orhem beger also tho scickende, szo dath dusse artikel nabescreven schullen sin ohr leste wille. Up dat wy nhu alsodanen guden werkes mede dehelhaftich mogen werden, hebben wy umme beden willen der vorgenanten wedewen uns darihn gegeven unde dhoen dat in crafft dusses breves unde willen nha alle unsem vormoege, dath sodane scickunge unde ohr leste wille eynnen vortganck schulle hebben, ewich tho blivenden. Des schullen wy unde willen twe unses amptes mechtich maken unde dartho bequemen, dede allejerlikes sodane veher gulden jerliker renthe in nochfolgender wiße geven schullen: dath erste jar nha orhem falle orhem broder Ludeken Runiges tho behoeff siner kinder alse Magdalenen, Kathrinen, Hans, Annen, Ilsebe, Magreten, Ludeke unde Samuel; des anderen jars orher suster Margreten, Hinrich Lodiges zeligern nagelaten wedewen, tho behoeff Jacobs unde Hanses orher szoene; des dridden jars orhem anderen broder tho behoeff Bartolomeus, Valentin, Margreten, Annen unde Gerdruth; des verden jars der anderen suster by nhamen Anne Ackenhusen mede tho besten Hanse unde Achilles orhen szoenhen, unde wen dusser benompter kinder orhe elderen vorstorven, den allewege den dem oldersten orhem nachgelaten kinderen, dede sodane veher gulden mith sinen anderen broderen unde susteren schal gelickmetich delen, idoch vorbeholtlich, so offte dusser vorbenompten veher broder unde suster orher kinder eynn tho godt edder der welth gedigen unde tho den erhen schal beraden werden, welkes jars dath gescege unde so offte, dem edder der schullen szodan veher gulden tho orhen erhen dessulvigen jars overekenth, unde darnach nha voriger ordenunge, dar idt gebleven, alletidt vorthgefaren werden. Wen aver dusse vorbenompten live alle noch dem willen gots ablyvith, den unde nicht eher schullen unde willen wy szodane veher gulden jerliker renthe ihn de hende der rechten noettrofftigen armen noch sinne unde witte unde nicht nha gunsth uthodelende vorplichtiget sin, also dath wy schullen unde willen effte unse nachkomen vorordenen unde bescicken, dath allejerlikes up vorbenompten termin vor szodane veher gulden jerliker renthe Nygensteder wanth, sovehel unde nha alse menn dath bekomen kan, schall gekofft, den armen, sovehel men darmidt besorgen kan, schall uthgedelet unde gegeven werden, dath uns de vehelgedachte wedewe up unse conscientien ewichlich unde anhe affbrock, ock enige vorhindernisse, also tho vorfolgende bevholen, dath wy ock darup also fullennthobringende angenhomen hebben unde hirmith vorheten in crafft dusses breves. Begevet sick aver, dath wy edder unse nakomelinge dusse schickunge unde giffte noch der wedewen ordenunge unde willen uth vorsathe nachleten unde nicht deden - alse wolt godt nicht gescheen schall - , denne unde sunstent nicht schullen wy vorplichtiget, szodane hundert gulden munthe hovetsummen mith thodaeth vorbenompter frunde rade, wetthen unde willen ahn ander gewisse renthe unde guder tho beleggende, also, dath de vorbescreven schickunge neines jars vorbleven noch vorbliven moege, dartho wy helpen unde arbeiden schullen unde willen, ock vortsetten unde beschermen truwelich anhe alle geverde. Alle puncte unde artikel dusses breves reden unde loven wy upgemhelten mester unde olderman unde gemeinen werken vorbenompten amptes vor uns unde unse nakommen der vorgedachten wedewen, orhen broderen, sunsteren unde dersulven orhen kinderen wu boven by nhamen getekent sampt alle orhen mithgedachten in gudem gelovenn unde warem truwen stede, vasth unde unvorbroken wol tho holdende, mith gantzer vorticht alle desjennigen, dath der wedewen unde orhen mithbescrevenen mochte ahn orher betali schetlich unde uns betlich sin, truwelich unde ungeverlich. Unde des tho forderer seckerunge unde bekantnisse hebben wy unses amptes ingesegell witliken gehenget ahn dussen breiff, nha Christi geborth Dusent viffhundert darnha im sehesundevertigesten jare, mandages in den hilligen Paschenn.