Wi de rath der Nienstadt vor Hildesheim bekennen hirmitt vor uns und unser nakomen openbar, datt vor uns ist erschenen de Wilckensche, seligen Hanse Wilckens nagelaten husfruwe, mitt einem vorsegelden husbreve up ohr hus und hoif up der Gunterstraten twischen Dirich Orthmans und Jurgen Knusten husern belegen sprekende, mit bitt, wi anstadt ohres gedachten zeligen ehemans ohren itzigen eheman Arnde Wichmanne sodan hus und hof wolden eigenen und tho einem miterven dessulvigen constitueren. Demnach setten wi densulvigen Arnde Wichmanne tho einem rechten erven des gedachten huses, hoves und woninge, also dat he und sin husfruwe mit demsulvigen mogen doen, handelen und laten in aller maten Hans Wilckens seliger hadde doen konnen und mogen, ane menniglichs insage und verhinderung. Und de schniders hebben eine rennen, dardorch dat water in ohrem und dussem hove versamblett dorchlopen schal, gelegt, demnach de besitter dusses huses tho sinem watergange mede gebruken und de rennen mitsampt den schnidern in beternisse helpen holden. Ock horet de wandt twischen dussem und der schnider hoffe tho dussem huse alleine, dardorch ock de waterganck in vorbenante rennen unverhindertt schal gestadett werden, und nein schade daranne, ock an der wandt dem besitter dusses huses bejegenen. Dus in urkunde dusser bref mitt unser stadt ingesegel bevestigett, im jare nach Christi geburtt Dusent vifhundertt vifundseventig, dinsdages nach Reminiscere. lb lb Benedictus Steuer, lb Hans von Essen.