Wi de rath der Nienstadt vor Hildensheim bekennen openbar in dussem breve, dat vor uns ist erschenen Casper Pfluch, bekande vor sich und sine erven, dat he gelaten und tho einem rechten ervenkopes verkoft hebbe sin hus, hoff sampt der gantzen woninge und thobehoringe als dar tho gehorett, belegen vor dem Brueldore twischen Berndt Beckers und Bartolomeus Vetten husern und woningen, Hanse Jordanß und sinen erven. De vorbenompte Casper Pfluch heft vortmehr vortegen und eine rechte vorticht gedan deß vorgeschreven huses, bleckes und woninge mit vorticht alles rechten, so he und sine erven daranne hadden und in jennigerleiwise bereden konden, mit hande und munde in unßer jegenwordicheitt, alleß tho handt und behoiff Hanse Jordans und siner erven. Und deß tho orkunde hebben wi obbenanter rath der Nienstadt vor Hildensheim unser stadt ingesegel an dussen breff laten hengen, geschein im jhare nach Christi gebortt Eindusent viffhundertt sevenundsestig, dinßdages nach Trinitatis.lb lb Beneditz Stever, lb Hinrich Brunst.