Wy hirnach bescrevene hern Tilo Lehnhoff supprior, Conradus Sweme senior, Johannes Grote custos und broder Hans Brocke, noch tor tydtt ingecledete professi und fratres des convents und closters sancti Pauli im Bruele vor Hildensem gelegen, ock wenthanher mith den, de vor uns in Christo entslapen syn, vor velen jarn bositter der guder, ßo by de ßulven kercken und vorßamlunge funderet und gegeven, dhoen kundtt und bokennen vor uns und idermenniglichen, nachdem wy godttloff itzundtt durch de gnade Christi uth gotliger hilliger schrifftt erfunden, vel heller und clarer, alß vorhen etlige hundertt jar geschein, an den dach gegeven unnd openbar, datt vorerst an der reynenn predige und lere gotliges wordes des hilligen Evangelii, thodem ahn eynem godtzeligen christligem regimente und datt unstraffbare geschickte menner, de solchs allenthalben handthaven und vortzetten, dartho vorordentt, mergklich und veel gelegenn, und wan duße beiden stende wol vorsorgett, ßolchs gereichett und kumpt eyner stadtt und gantzer gemeyne thom besten, heil und wolfartt. Wedderumb wy ock uth der sulvigen gotlichen schrifftt gelerett hebben, sporen und mercken, datt alle de guder, de vor langen velen jaren by uns und unsern vorfadern van dem erbarn rade der stadtt Hildensem, ohren borgern und inwonern in unse und unsers glicken clostere gekortt und gegeven, durch eynen merckligen groten mißvorstandtt angelechtt und tozambden gebrachtt syn worden, alße woren der unser stilmißen datt allerhilligste und godde angenhemest werck, qwemen ock tho nutte und fromen den vorstorvenn, dartho were de monnekerie nichtt alleyne vor sick ein hillig standt und levent, sunder de ßulve ohre hilligheitt, vorbidt und disciplinae qweme ock tho bate denjennen, de ohre milden almißen dartho gegeven, szo doch kein ander misse thor vorgevinge der sunde, alße datt eynige opper unsers hern Jhesu Christi, am holte des crutzs geßlachtett, vorhanden is, des he uns eine ewige gedechtnuß in dem abendtmal tho holdende bevolen hefftt, nicht dar ein ider vor sick alleyne ethe und drincke, wo wentherto geschein, und alßo den lyff und bloidtt Christi mißbruckligen oppere, sunder dar vele ader jo etlige communeren, nicht tho offernde, ßunder tho gedencken an den doith und lydentt Christi, wu Paulus thom Romern am 4. darvan tugett: He is umb unser sunde willenn hengegeven und umb unser gerechtigheit willen upgestain. Welcheren vorstandtt uns helle und klar de worde Christi ßulvest vormelden, dar he sprickt: doeth ßolchs tho myner gedechtnuß. He secht nichtt: oppertt etc. Desglichen ock de herlige textt sancti Pauli an de Corinther uthforett: Wenthe ßo vaken (spricktt he), alße gy van dußem brode ethen und van dem kelcke drincken, vorkundigen gy ju undermalck andern des hern doith wenth datt he kumpt. Szo ist ock nichtt hellers ader clarer am dage, dan dat unser glich aller andern closterlude levent und disciplinae falsche erdichtede minschensate, benawinge und stricke der conscientien gewest syn, darvan Christus, ock Esaias thovorn gesechtt: Frustra colunt me docentes doctrinas, mandata hominum1. Item de hillige Paulus precitiose empti estis nolite fieri servi hominum2. Item an de Galater am vifften: Szo bestaett nu in der fryheidtt, darmidt uns Christus befrieth, und latett ju nicht widderumb in datt knechtesche jock fangen3. Szo hefft ock neyn folck ader standt (int gemein geredett) unhilliger gelevett, alß in clostern, ane watt dat vor eine sware ßunde is, datt ein ider up syne wercke und vordeinst buwett, de ßulven uthschriett und veile bedett und dardurch vorhete und vorspreke den mynschen afflaett und qwitunge ohrer ßunde, wu lenger geschein. Uth duße angetogenen, ock allen andern vormoge der gotligen schrifft gefasseden orsaken syn wy obgemelte hern und fratres uth eynem gotligen und christligen iver, ock uth einem beswerligen gehete unser conscientien bewagen, itzundtt friehs umbedwungen gemoites und wyllens by unsern geßunden lyves und levendes bedachtt, solche guder an christlige order, dar de tho ewigen dagen, ßo lange de werlt swebet, blyven anthowendende, willen demnach eynem erbarn rade und vehrundtwintich mannen beneffen flitiger bidtt thom hogsten vormanett und bevolen hebben, sze wollen duth alles neben uns christlich bedencken, ock steds furderlich syn und vorhelpen, datt de guder up folgende maten angewant werden, darmidtt unse conscientie alßo libereret, wy an iderm dage deßhalben wol entschuldigtt syn und bliven mogen, twiveln ock nichtt, wan unser noch wel mehr im closter huts dages vorhanden woren, ock durch velfoldige berichte godtligs wordes darhen darhen beredett, biddende, nachbemelte puncte mith flyte zu overlesende und de umb Christus willen approbern und geschein laten. Solchs wert godt der almechtige in ohrem bevolen und uperlechten ampte ricklich belohnen. Tom ersten szo hebben wy dre foder korns jarliger tinße tho Asell an Eyken Wildefurs lande und gude in langer upname gehatt, de ßulffen wy in dre pharkirchen alß Andree, Pauli und Georgii tho furderung des predigstols vorordentt hebben; item, wy hebben alle jar by dem abte und closter Godehardi seßunddrittig punt lutke, noch drittig puntt by den hern der congregation, darto dreundtwintigsthalff punt by Hinrick Beckman tho Hannover: datt alles wy ock in de kircken St. Pauli gegeven, in dem datt eyne parkircken blifft, wurde se aber niddergelecht, scholde itztgemelte gave vam erbarn rade in alle andere parkerken gedeelet werden; item tein goltgulden jarliger rente by dem closter Michaelis, schullen de castenhern Andree tho erholdung des predigstols inmanen, item wy hebben jarligs tinßes van dem closter thor Sulten vehrundtwintig puntt lutke, noch by Hennig Stein vefftein lutke punt jarliger rente, hebben wy der kircken St. Jacobi thom predigstole vorordentt, item noch 38 lutke punt by dem capittel up dem berge S. Mauritii vor Hildensem, sin van uns by de beiden ampte garffer und schomaker tho erholdung eins borgersßhone thom studio vormuge einer fundation thogekertt; item twintich puntt tinßes alle jar tom Soltedethford, und seventein punt tinses to Gottinge, ist by de snydere tho Hildensem ock tho hulpe eins borgersßone thom studio gegeven; item achtehalff puntt tinßes by den van Anderten tho Hannober, darto achthalff puntt by Brande Staforde, darto noch tein punt by Marten Ekenberge, schall ock eins armen gemeynen borgers dochter, wen se to den ehren gedegen, hebben, und alle jar vam olderman der meynheit gefurdert weder gegeven werden; item elffen puntt jarligs by dem rade und snydern, vort vefftehalf punt lutke by itligen borgern up der Nigenstadtt, des schullen sick ein ersam raidt und twolffman darßulvest tho eyner ewigen presentien, dwile de vellichte gantz wenig beguldet und de personen nicht gliches vermogens, erfrawen; item Hinrick Eggerdes, Hinrick Schapers, Hinrick Lusten, Annen Hundemans huße vor in dem Brul gelegen, her Johan Solters und der Frickschen up dem kerckhoffe, her Hinrich Kreningkhusen, her Frenck Magett, her Mathies des probstes und hern Bartolt Nagels huiße im hindersten Brul, duße vorberorten tein huse ader wonunge schullen nach unsern und derjennen, ßo noch lyve daranne hebben, affstervende, in der gemeynen stadtt nuth und beste gekart syn und unvorruckt darby bliven, dat wy vor godt und einen idern mith guden gewetten wol vorandtworden willen. Dwile wy ock by einem erbarn rade tho Hildensem in vorflotenen jaren viffhundert gulden ahn golde und ßulvers belechtt und darup uns jarligs twintig gulden als up ider hundertt vehr gulden tinße vorschreven, solchs alles unangesehn wollen wy einem erbarn rade tho ehren und gefallen jarligs dwile wy leven tein gulden, is up ider hundert twe gulden, to entfangen gewerdig ßinn. Noch vefftein gulden munte up de drehundert gulden an holte, noch einunddrittig punt uth der kemerie, noch tweunddrittig punt by dem rade tho Hannover, noch twolff punt tinses by Hinrick van Reden, duße vorertalden summae als vefftig gulden munte willen wy uth christliger milder andachtt einem erbarn rade und XXIIII manen, dwile vel personen nicht glichs vormogens ohrer narung tho raidthuse gain, dat ohre aldar vorsumen moten, vorordent hebben to eyner ewigen presentien, und dat dußen folge geschein moge. Und wy vorgenanten hern und fratres wollen uns hyrmidt bewilligt und nachgegeven hebben, wanner unser ein ader mehr nach dem willen godts doitlig vorschede, schal van stundt des ader der vorstorven deel und anpart an de order, darhen eth mildiglig gekartt, angewandt werden, welchs wy alßo by unsern hogsten pande der zelen ßalicheith tho holdende angelovet und vorplichtigtt hebben. In orkunde der warheidt hebben wy unsers convents und closters rechte ingesegel witlig an dußen breff gehangen, gegeven nach Christi unsers leven hern gebortt im veffteinhundertt sevenundvehrtigsten jare, am dage Michaelis archangeli.