Wy Johannes abtt des stiftes sancti Michaelis in Hildeschem bekennen opentlick in unndtt myth dussem breve vor unnß, unnße nachkomen unndt alßweme, dath wy heffen belehneth unndt belehnen jegenwordigen in crafft disses breves Herman Tymmerman, borger tho Hildeschem, myth einher halven hove landes vogetfrig vor dem dorpe Lütken Vorste belegen myth all ohrer thobehoringe aller mathen wu gemelter Herman Tymmermann desulvigen von unserm vorvadern zeliger abtt Herman tho lehne gehapt unndt gedragen hefft. Schall derwegen gedachte Harman Tymmerman unß, unserm stift gudern undt personen truwe unndtt holdt wesenn, unser argeste unnd schaden warnen undtt vorhoiden unndtt unnser beste tho ider tydtt helffen soyken, forderen unndt reden, wu ehr des von wegen der lehnwaringe schuldich unndt plichtich yß. Unndtt wy wyllen ohme dusses genanten lehngudes synn bekennyge here undt warer wesen vor aller ansprake, so vaken ohme des noidt unndt behoiff ist unndt geborliger wyse van unß geeschet unndt geforderth werth. Dusses tho merer orkunde unndtt tuchnisse heffen wy unser gewonlige der ebdie ingesegell unnden an dissen breiff gehengeth. Geschein im jare nach der gebordtt Christi unsers lieben hern im Vifteinhundersten unndt viffunndtveftigesten, sondages nach Trium Regum.||