Wir Johannes Abtt des Closters Sancti Michaelis in Hilldenßheimb bekennen öffentlich midt diesem Breive jegen allermenniglich, das wir haben zu einem rechten manstadigen Erflehne belehnet unndt belehnen jegenwerttigen in unndt midt Crafft dieses Brieves den ehrenvesten unndt hoichgelartten Johan Brandes, beider Rechten Doctorn unndt Bürgern zu Hilldensheimb, alß den Eltesten ihres Geschlechts der Brende zu Midtbehueff seines Bruders Jochim Brandes, B[ürgers] alhie, Doctoris Christoffori, Tilen, Barttram unndt Hanßen Brandes seligern nachgelaßenn Sohnen, unndt deren allerseits menlichen Lehenserben midt vier Hildensheimischen nien Schilling auß den Fronenzinse zu Hilldensheimb, so sein Elttern unndt Vorelttern die Brende von unser Ebttie zue Lehne getragen, unndt wir willen ihme sothaner Belehnung ihre rechte bekenninge Heren unndt Werende wesen, wen ihme des Noht unndt Behueff ist unndt gepürlicherweise von unnß gefurdert wirtt, unndt ehr soll unns, unserm Cloister unndt Persohnen getreuw unndt holdt sein, alß ehr wegen der Belehnung schuldig unndt pfligtig ist. Des zu ferner Urkundt haben wir unser Ebttie Ingesiegell wissentlichen an diesen Brieff lassen hangen, gegeben nach Christi unsers lieben Hern unndt Salichmachers Gebuerdt im Jahr Eintausent sechshundertt unndt elffen, den 26t. Aprilis.||