Ich Gerung von Otakaring vnd ich Alhait sein Havsfrow^e wier verriehen vnd tu^en chvnt allen den disen prief lesent oder horent lesen, daz wir mit verdachten mu^ot mit gu^oten vnd mit gvnst aller vnser erben ze der zeit, da wir iz wol getu^on machten, allen den chrieg, den wi^er gehabt haben an dem gu^ot daz plechking, daz wi^er ch[ouft] heten datz vnsers herren holden Bischolfs Wernhartes ze Pazzow, vnd vnse der chouf ze recht nicht angeho^ert hat, daz wi^er davan lediglichen vnd vnverschaidenlichen sein gestanden, also daz wi^er fu^erbas nimmermere chain ...sicht schvllen haben an dem gu^ot. vnd haben paidev den chrieg vnd daz vorgenante gu^ot datz plechking ... herren Bischolf Wernharten zu Pazzow vnd seinem gotzhouvs lediglichen ouf geben allen i^ern frome da mit ... vmb fier vnd zwainzig pfvnt wienner pfenning vnd ain halbes fu^eder weins meiner hovsvrow^en Alh... ze ainen Leitchouf, der wi^er paider recht vnd redlich sein gewer. vnd von der wise, die wi^er datz ... heten gechouft von Fridrichen dem Schirch Schenchircher, die wi^er im mit dem vorgenanten gu^ot haben geben, lediglichen fv^erbas an alle ansprach. Dez sint zevg her Helmweig pfarrer ze Potenstain, Seifrid ... Eisdorf, Hainreich der chirchlinger, Ottakcher vnd V^ello seins bru^eder matzeer, Leudold der Schriber, Otta... dolf Rueger Stevzer vnd andere frome levte genu^eg, den disev sach wol chvnt ist. Daz disev redd stete beleib vnd vnzibrochen darvmb so geb wi^er ich Gerunkch von Otakaring vnd ich Alhait sein Hovsvrow^e disen prief zv einem sichtigen v^erchvnde vnd zv ainem offen zevg diser sach verinsigelt mit vnserm insigel, vnd mit hern Chunr(?) dez Ertzpri^esters insigel von Tvln(?), der diser redd zevg ist mit seinem insigel. Der prief ist geben datz Zaizenmow^er da van Christes gebuert waren ergangen drevzehen hvndert Jare darnach in dem achten Jare, nach Sand Merteins tag dez nahsten vreitags.