In nomine dominj. Ego Henricus Abbas de Pru^el et Ego Gerungus Praepositus de Osterhouen et Ego Rudpertus Ratisponensis Ecclesiae scholasticus ex delegatione Sedis Apostolicae de causa, quae uertitur inter Praepositum de Ranshouen ex una parte et Chunradum Archidiaconum Patauiensem ex altera super Archidiaconali Jurisdictione in Parochia dictae Praepositura exercenda uel non, cognoscentes, sicut potuimus, ueritatem perscrutati sumus et quia dictus Archidiaconus peremptorie a Nobis citatus nec venit nec causae suae defensorem misit, Priuilegium Sedis Apostolicae, quo dictus Praepositus Ecclesiam suam munitam esse dicebat, legentes inuenimus in eo contineri, quod nullus in Parochia saepedictae Praepositurae Jurisdictionem aliquam debeat exercere praeter Archiepiscopum et Diocesanum Episcopum et eiusdem loci Praepositum, Vnde manifeste apparet, quod Archidiaconus sit exclusus. Quam ob rem auctoritate, qua fungimur, sententiantes Praepositum Ranshouiensem et totam eius Parochiam ab impetitione dicti Archidiaconi absoluimus et ab omni Archidiaconali Jurisdictione iuxta intentionem et concessionem factam a Coelestino Papa eam cum Capellis in Priuilegio denominatis exemptam esse iudicantes Statuimus, ne uel ipse uel aliquis Successorum suorum Archidiaconorum contra Tenorem illius Priuilegij aliquam in Territorio Ranshouiensis Praepositurae et eius Parochia cum Capellis in Priuilegio denominatis Archidiaconalem Jurisdictionem debeat exercere. Datum Ratisponae in maiori Ecclesia Sancti Petrj. Anno Incarnationis Dominicae M. CC.XI. Idus Nouembris.

Source Fulltext: OÖUB 2 (Wien 1856) S. 533