Ich Hanns der Peterlehna^er und Fridreich von Hyrspu^ehel ze den zeiten zechmaister ze Hochberch und wir pfarrlaw^et da selben all gemainchleich bechennen, daz wir mit wolbedachtem mu^et reht und redleich gestift und gewidempt haben ain ewigew^e wochen messe dar zu Fridreich der Peterlehna^er und Katrey sein hawsfraw^e geschalt und gegeben habent zwelif pfunt beraiter pfenning also beschaidenleich, daz dew vorgenant messe all wochen an dem mitichen gesprochen und vollpraht sol werden unvertzogenleich in dem obgenanten gotzhaws ze Hochburch Got und unser fraw^en ze lob und allen gelaw^ebigen seln ze fraw^een und ze trost, und darzů all quatember ayn vigilig und zwo messe aynew gesungen und aynew gesprochen, die unser pfarrer von Geroltzperig und sein gesell auch unvertzogenleich begen und volpringen schu^ellen dez freytags in der quatember wochen: den selben vorgenanten gotzdienst hat der erwirdig herr probst Stephan von Ranshoven mit dez capitels rat und willen geewigt und besta^et in der beschaiden, daz wir dem egenanten pfarrer von Geroltzperig und seim gesellen dar umb gemacht und gewidempt haben ewigs geltz vierzehen schilling pfenning die denn gib und ga^eb sint, dem pfarrer dew zwaytayl und dem gesellen daz drittayl, also daz wir si dez obgenanten geltz wern und rihten schu^ellen zu^e yeder quatemper vierdhalben schilling pfenning auz dem zechschreyn unsers vorgenanten gotzhaws unvertzogenleich und an alz geva^er, wa^er aber ob in daz vertzogen wu^erd von wie getanen sachen daz gescha^ech, so schu^ellen darnach nach dem verziehen darauf gen zwelif pfenning alz lang untz daz si dez vorgenanten geltz mit sampt den pfenning die zů yeder vrist darauf gegangen sint verriht und bezalt werden an allen schaden, daz schu^ellen si haben datz unsers gotzhaw^esse ze Hochberch hab wo ez die hat oder wo dew gelegen ist versůcht oder unversůcht. Ez ist auch ze merchen ob der egenant gotzdienst all wochen an dem mitichen und zů yeder quatemper an dem freytag niht volpraht wu^erd alz oben verschriben stet, so sol ez unvertzogenleich geschehen an dem nahsten tag hinnach, und ob dez aber niht gescha^ech so gend dem pfarrer und seim gesellen alz oft zwelif pfenning ah an der obgenanten gu^elt der si nimmer mer gevordern schu^ellen in dhayner weys alz lang untz daz der vorgenant gotzdienst begangen und volpraht wirt. Ez ist auch getaydingt ob ain veyrtag an den mitichen geviel alz oft daz gescha^ech, so schol dew messe an dem na^echsten tag ervolt werden und ob ayn veyrtag an den freytag in der quatemper wochen geviel so sol dew messe vor oder nach an aym andern tag begangen werden, und daz schol der pfarrer den pfarrla^ewten chu^enden oder sein gesell dez nachsten sunntags vor der quatemper wochen. Daz daz also ewichleich sta^et gantz und unzerbrochen beleib geben wir den gegenwurtigen prief versigelt mit dez erbern mannes Hainreich dez Alters ze den zeiten vormaister anhangunden insigel, darunder wir uns all unverschaidenleich verpinden mit unsern trewen an ayds stat ewichleich sta^et ze haben und ze volfu^ern alz daz an dem prief geschriben stet wan wir aygna^er insigel nicht enhaben. Dez sint zew^eg und taydinger gewesen Hansel Treyber Fridreich Treyber Ha^ensel der Swartz Treiber Pawls von Ja^ergersteten Ulreich der Zypfla^er Asperl von Swant und ander erba^er law^et genůg. Daz geschach an sand Grego^ergen tag do man zalt von Christi gepu^ert drewtzehen hundert jar darnach fu^enf und sybentzig jar.

Source Fulltext: OÖUB 8 (Wien 1883) S. 745ff., Nr. 724