Wir graf Hainrich von Schownberch hechennen und tun chunt offenleich mit dem brief, das die erbern und geistlichen leut herr Stephan der probst von Ranshoven und sein capitel bey uns gewesen sind und habent uns mit guten briefen die si von unsern vordern heten, underweiset der freiung die si ze Aschach an unser maut habent. Wann wir nu Gotes gabe und gute werich die unser vorvodern untz an uns geben und gehandelt habent nicht abnemen sunder pesseren sullen und auch wellen ze allen zeiten, haben wir angesehen das sich der vorgenant brost und sein capitel mit irer andacht und gutem willen uns und den unsern in allen sachen dienstleich erzaigen, und haben in ir vorgenante freyung durich Gott und von besundern genaden und durch irer vleissiger pet willen vernewet also, das si jerlichen fünfzehen fueder weins von Oesterreich und anderlay das si ze irem gotshaws bedu^erffent frey und ungemaut ze Aschach fürfüren sullen. auch mügen si ungemaut fürfüren waz zimerholz und waz si chöst von ires gotshaws wegen oder ze iren höfen bedürften also, das unser mauter ze Aschach von allen sachen nicht anders denn von dem vertiger das gewöndleich recht von dem podem und von den flössen vodern und nemen sol, und wellen auch ernstleich das all unser amptleut ze Aschach nu und fürbaz bey uns und unsern nachkomen das egenant gotshaws hey der vorgeschriben freyung und genad ewichleichen beleihen lassen. Des geben wir ze urchund den brief versigilten mit unserm grossen anhangendem insigel, der geben ist ze Schewnberch an suntag nach sand Luceyntag da man zalt nach Christi gepurd MCCC jar und darnach in dem Lxxv. jar etc. (millesimo trecentesimo septuagesimo quinto).

Source Fulltext: OÖUB 8 (Wien 1883) S. 792f., Nr. 766