Ricardus dei gratia abbas de Waltham et eiusdem loci conuentus uniuersis Christi fidelibus ad quos scriptum presens peruenerit salutem et coniationes in Christo Nouerit uniuersitas uestra nos inplacitasse in curia domini regis Ricardum filium Wymer de quodam tenemento quod tenuit in Passefeld de dono Wydonis quondam decani de Waltham et ad talem finem loquele illam perduximus quod sepedictus Ricardus filius Wymer predictum tenementum et cartam supramemorati Wydonis decani quam inde habuit in manus nostras quietum resignauit ea conditione ut nos sibi excambium alicubii in eadem uilla daremus Nos uero pro homagio et seruitio suo concessimus ei et heredibus suis viginti quinque acras terre arabilis in essarto nostro in prenominata uilla de Passefeld nomine excambii tenend de nobis sibi et heredibus suis libere et quiete reddendo inde annuatim nobis duas liberas preces in autumpno singulas cum uno homine et quinque solidis redditus annuatim ad quatuor terminos uidelicet ad festum Sancti Michelis xv denarios ad Natale xv denarios ad Pascha xv denarios ad festum Sancti Iohannis Baptiste xv denarios pro omni seruitio Nos autem hoc tenementum warantizare debemus illi et heredibus suis contra omnes homines Et ut hec nostra concessio sibi et heredibus suis firma et stabilis permaneat hanc cartam nostram inde sibi fecimus et sigillo nostro eam roboramus

Source Fulltext: Early Charters of Waltham Abbey. Rosalind Ransford. Studies in the History of Medieval Religion, V.2. Boydell Press. Woodbridge, Suffolk, Wolfeboro, N. H., USA. 1989.