Notum sit omnibus quod cum Magister Wiscardus persona de Wodeford auctoritate iudicum a domino papa delegatorum scilicet decani de Leicestre et coniudicum suorum in curiam traheret abbatem et conuentum de Waltham petens ab eis decimas omnium terrarum quas habent in uilla de Wodeford cultarum et incultarum et decimas noualium suorum et minutas decimas et competentem communiam cum eis in eadem uilla et dicti abbas et conuentus dictum Wiscardum coram domino abbate de Waledene et priore de Hatfeld iudicibus a domino papa delegatis super iniusta molestatione et uexatione contra diutinam et pacificam possessionem ecclesie de Waltham necnon et contra usum et tenorem priuilegiorum suorum ad quorum conseruationem dictus Magister Wiscardus iuramento tenebatur in curiam traherent Tandem omnes lites huic inde mote amicabili compositione conquieuerunt hoc modo scilicet quod dicti abbas et conuentus concesserunt predicte persone et ecclesie sue de Wodeford talem communiam in communi pastura predicte uille scilicet quod predicta persona habebit in communi pastura dicte uille sine molestia et contradictione octo uaccas sex equos quadraginta oues et viginti porcos superannuatos cum sequela sua in bosco suo quietos Domus uero de Waltham in eodem statu remanebit excepta predicta communia predicte persone concessa in quo fuit initio litis mote scilicet quod habet et habebit immunitatem decimarum omnium noualium suorum in dicta uilla et omnium minutarum decimarum et etiam maiorum decimarum antiqui dominici sui quam immunitatem ecclesia de Waltham habet et habuit ab antiquo Ita quod ecclesia de Wodeford percipiet sicut ab antiquo percepit de dicto antiquo dominico tantum duas acras rationabiles scilicet unam de frumento et aliam de auena tempore messium a preposito dicti abbatis dicte persone et ecclesie assignandas De aliis uero terris culturis que ad abbatem peruenerint per escetam uel alio modo unde ecclesia decimas percepit decimas maiores plene percipiet Et utraque pars ad huius compositionis obseruationem solempniter se obligauit in capitulo de Waltham scilicet predicti abbas et conuentus per Magistrum Ricardum procuratorem suum et Magister Wiscardus in propria persona prestiterunt iuramentum corporale quod dictam compositionem fideliter obseruabunt et promisit utraque pars quod occasione predicte dissentionis nulli homini nunquam alter eorum grauamen uel molestiam inferret uel inferri procurabit Et utraque pars expresse quantum ad omnes articulos contentes in predicta compositione renuntiauit impetratis et impetrandis et si contingat quod aliquis eorum contra predictam compositionem uel aliquid comprehensum in eadem aliquod rescriptum impetraueret inefficax erit et omnino uiribus carebit Et in huius rei testimonium confectum est presens scriptum inter partes in modum cirograffi et una pars sigillo domini abbatis consignata est altera uero sigillo Magistri Wystardi Facta est autem hec compositio anno ab incarnatione domini mccxxiiij uigilia assensionis domini

Source Fulltext: Early Charters of Waltham Abbey. Rosalind Ransford. Studies in the History of Medieval Religion, V.2. Boydell Press. Woodbridge, Suffolk, Wolfeboro, N. H., USA. 1989.