Universis sancte matris ecclesie filiis ad quos presens carta pervenerit Hub[ertus] dei gratia Sar[esburiensis] episcopus eternam in domino salutem Nostri est officii que caritatis sunt fovere que pietatis promovere Hac siquidem inducti consideratione de assensu et coniventia dilecti filii nostri Galfr[edi] archidiaconi Berkess[ire] concessimus et presentium auctoritate confirmavimus ut omnes fructus et obventiones capelle sancti Laurentii de Rading[ia] in usus et necessitates hospitalis eiusdem loci convertantur ad sustentationem xiii pauperum qui ibidem pro salute anime nostre et antecessorum et successorum nostrorum necnon et domini Rann[ulfi] de Glanvill[a] et domine Berte uxoris sue qui nos educarunt et pro anima patris mei et matris mee et omnium parentum et benefactorum nostrorum perpetuo procurabuntur Et si eiusdem capelle redditus ad id non suffecerint dilecti filii nostri abbas et monachi de Rading[ia] quod defuerit ex condicto subministrabunt preter alios xiii pauperes quos in eodem hospitali de suo specialiter exhibebunt Statuimus etiam ut capellanus ad predicti abbatis et monachorum presentationem in eadem pro tempore capella per nos institutus quamdiu ibidem per eosdem ministraverit canonicis mandatis nostris obediens existat veruntamen nec ad sinodum ob communem causam nec ad capitulum extra villam Rading[ie] aliqua ratione tractus veniat et ut ab omnibus consuetudinibus et omnibus que vel ab episcopo vel eius officialibus exigi solent immunis semper existat Et si forte idem capellanus pecuniariter sit puniendus pena eius cedat tantum in utilitatem memorati hospitalis De suo dumtaxat ordine soli episcopo respondeat abbati vero et monachis de ceteris omnibus que ad capelle et hospitalis pertinuerint administrationem Is etiam honeste vite sit et opinionis integre in hospitali manens eiusdem curam et animarum sollicite gerat pauperes et peregrinos in mensa hospitalis secum cotidie a consanguineis et aliis secularibus semotus suscipiat in usus preassignatos omnia quecumque perceperit ex integro convertat Quod si secus quod absit egerit post ammonitionem diligenter exhibitam si incorrigibilis extiterit illum abbas amoveat et alium idoneum episcopo ad idem officium representet Si quis igitur hoc nostre concessionis statutum infringere vel minuere presumpserit nostram maledictionem et divinam in corpore suo sentiat ultionem Qui vero observaverit et manutenuerit retribuat deus benedictionem pro benivolentia gratiam pro gratia vitam eternam pro boni operis beneficientia Testibus hiis prenominato Galfr[edo] archidiacono Azone archidiacono Sar[esburiensi] Bald[ewino] cancellario Sar[esburiensi] magistro Vincentio vicearchidiacono Wilt[esire] Roberto de Bellofago magistro Simone de Scal[is] magistro Ricardo de Claie magistro Alexandro capell[ano] Gautero capellano Teodeb[aldo] Gauteri et Bartholomeo fratre eius

Source Fulltext: Reading Abbey Cartularies. B. R. Kemp. Camden Fourth Series, V.31,33. Offices of the Royal Historical Society. London. 1986-87 .