Omnibus Christi fidelibus ad quos presens scriptum pervenerit Herb[ertus] dei gratia Sar[esburiensis] episcopus salutem in domino Inter omnes pastoralis officii sollicitudines ea precipue est commendanda diligentia que et Christi famulis in habitu religionis iugum obedientie portantibus pia subvenit provisione et fidelibus Christi loca eorum in orationum devotione et elemosinarum largitione visitantibus sarcinam pene pro peccatis inflicte paterna compassione studet mitigare ut et locus religiosus et reliquie sanctorum ibidem divina voluntate reposite digne venerationis per frequentiam fidelium gaudeant obsequio et pietas venerandum onus penitentiale sentiat alleviari Attendentes igitur dilectorum nobis in Christo filiorum abbatis et conventus Rading[ensium] in sancta religione fervorem et in operibus misericordie gratiam hospitalitatis sepe etiam supra vires facultatum suarum omnibus impensam de divine misericordie gratia et meritis sanctorum quorum reliquie in eorum monasterio continentur confisi omnibus confessis et vere penitentibus predictum monasterium in orationum sacrificio et elemosinarum beneficio visitantibus relaxationes penitentiarum quas diebus et sollempnitatibus determinatis venerabiles patres archiepiscopi sive fratres nostri episcopi indulserunt nosque auctoritate diocesana concedimus et cartis eorundem episcoporum super hec conscriptis quas inspici et legi fecimus pontificatus nostri assensum prebemus et confirmationem Numerum etiam dierum secundum indulgentiam in eisdem cartis contentam cum nominibus eorum qui inferius exprimendis sollempnitatibus indulserint certis duximus designare vocabulis De indulgentia beati Th[ome] Cant[uariensis] archiepiscopi qui ipsum monasterium in octav[is] Pasche dedicavit ad festum dedicationis eiusdem viginti dies De indulgentia Iocelini Sar[esburiensis] episcopi viginti quinque dies De indulgentia G[ilberti] London[iensis] episcopi xx dies De indulgentia r[oberti] Baton[iensis] episcopi xx dies De indulgentia Roberti Lincoln[iensis] episcopi xx dies De indulgentia Nigelli Eliensis episcopi xx dies De indulgentia Godefr[idi] Lanelven[sis] episcopi quindecim dies De indulgentia G[ilberti] Hereford[ensis] episcopi xx dies De indulgentia David Meneven[sis] episcopi quindecim dies De indulgentia Nicolai Landav[ensis] episcopi xx dies De indulgentia Hugonis Dunelmen[sis] episcopi x dies De indulgentia Bartholomei Exon[iensis] episcopi viginti dies De indulgentia r[icardi] Coventr[ensis] episcopi xx dies De indulgentia Hilarii Cicestr[ensis] episcopi quindecim dies De indulgentia W[illelmi] Norwic[ensis] episcopi xx dies Ad festum sancti Philippi de indulgentia G[odefridi] Winton[iensis] episcopi xl dies De indulgentia Iohannis Norwic[ensis] episcopi xl dies Ad festum inventionis et exaltationis sancte crucis de indulgentia Theobaldi Cant[uariensis] archiepiscopi viginti dies Nos quoque ad capellam de infirmaria eiusdem monasterii quam sancte et individue trinitati in octavis Pasche dedicando consecravimus omnibus confessis et vere penitentibus qui eandem capellam eodem die vel per octavas eius in orationibus vel beneficiis pie visitaverint de misericordia vere sempiterneque deitatis confisi viginti dies de iniuncta penitentia relaxamus et indulgentiam x dierum venerabilis fratris Eustachii Eliensis episcopi ad prenominatam capellam eodem die factam auctoritate diocesana confirmamus Et hoc totum cum presentis scripti testimonio et sigilli nostri appositione duximus testificandum Dat[] apud Suning[es] per manum Willelmi Raimundi xiiii kl[] Maii pontificatus nostri anno septimo

Source Fulltext: Reading Abbey Cartularies. B. R. Kemp. Camden Fourth Series, V.31,33. Offices of the Royal Historical Society. London. 1986-87 .