Uenerabili in Christo patri Henrico dei gratia Lincolniensi episcopo suus Reginaldus filius Petri miles salutem in domino Sancte paternitati uestre significamus quod cum olim bone memorie Petrus filius Herberti pater noster quandam curiam cum gardino quam habuit in uilla Oxonie deo et beate Marie et monasterio Radingensi monachisque ibidem deo seruientibus cum corpore suo totaliter per cartam suam contulisset nos dictam donationem ratam habentes ipsam predictis monasterio et monachis in perpetuum confirmauimus Et insuper ius patronatus ecclesie Sancti Iohannis Baptiste que sita est in eadem curia siue in eodem fundo quod ad antecessores nostros et nos aliquando de iure spectabat pro salute anime nostre et antecessorum nostrorum et successorum in puram et perpetuam elemosinam deo et beate Marie et predictis monasterio et monachis Radingensibus pro nobis et successoribus nostris in perpetuum donauimus concessimus et per cartam nostram confirmauimus Quibus donationi concessioni et confirmationi uestrum paternum implorantes assensum rogamus et deuote supplicamus quatinus presentatum ab eisdem ad dictam ecclesiam Sancti Iohannis utpote a ueris patronis et in posterum presentandos paterna sollicitudine admittere uelitis In huius rei testimonium presentes litteras nostras uobis et successoribus uestris ad perpetuam rei memoriam transmittimus patentes eisdem monasterio et monachis Radingensibus ad eorum munimen perpetuum si placet remittendas Hoc idem successoribus uestris quibuscumque presentibus litteris perpetuo ualituris significamus Dat apud Crocham anno gratie m cc lv die dominica proxima ante festum Natiuitatis sancti Iohannis Baptiste Ualete

Source Fulltext: Reading Abbey Cartularies. B. R. Kemp. Camden Fourth Series, V.31,33. Offices of the Royal Historical Society. London. 1986-87 .