Uniuersi sancte matris ecclesie filii nouerint per presentes quod cum rectores ecclesie de Wutton iuxta Bed Linc diocesis qui pro tempore prius exstiterunt fuissent in possessione pacifica percipiendi decimas maiores infra parochiam ecclesie de Merston iuxta Bed eiusdem diocesis per minutas particulas cum decimis dicte ecclesie de Merston diuersimode commixtas prouenientes de campis seu culturis que uocantur cultura inter Masebrok et Akeryerd et uiam regiam et Rodebrok item in Estcroftes et Westefeld a tempore cuius memoria non existit ac rectores ecclesie de Merston qui pro tempore prius exstiterunt fuissent a tempore cuius non exstat memoria in pacifica possessione percipiendi decimas maiores infra parochiam ecclesie de Wutton predicte per minutas particulas cum decimis dicte ecclesie de Wutton commixtas prouenientes de campis seu culturis que uocantur uidelicet Oueremanton Neyeremanton Crouchefurlong Lotebrache Lamberdesmere Clayfurlong Lanfotefurlong et Sceltonefeld tandem religiosi uiri prior et conuentus de N ordinis sancti Augustini dicte diocesis nunc habentes ecclesiam de Wutton predictam propriis suis usibus assignatam et magister Walterus de Wutton nunc rector ecclesie de Merston predicte sana consideratione communicatis inuicem consiliis suis utilitates ecclesiarum suarum consultius aduertentes necnon quod communio frequenter parere discordiam consueuit dampna etiam et pericula que ex huius commixtione ineuitabiliter sequerentur pro maiori tranquillitate super premissis inposterum optinenda concorditer composuerunt et conuenerunt in hunc modum uidelicet quod dicti religiosi prior et conuentus nomine ecclesie sue de Wutton seu quicumque eam futuris temporibus canonice possidebunt integre percipient de cetero omnes decimas quas dictus W rector ecclesie de Merston seu predecessores sui in eadem percipere consueuerant in campis predictis in Oueremanton et aliis suprascriptis infra parochiam ecclesie de Wutton existentibus et in quibuscumque locis campis seu culturis dicte parochie ex parte orientali uie regie que se extendit et ducit de Ouerscelton per pratum de la Hoo usque ad Wylegenebrigge et sic per caput orientale de Southmede usque ad Driepelingge sine contradictione uel clameo dicti W rectoris seu suorum quorumcumque successorum dictus uero Walterus rector ecclesie de Merston seu quicumque futuris temporibus dictam ecclesiam canonice possidebit integre percipient de cetero omnes decimas quas dicti prior et conuentus nomine ecclesie sue de Wutton et sui predecessores in eadem percipere consueuerant in campis predictis uidelicet in culturis inter Massebrok et Akeryerd et uiam regiam et Rodebrok in Estcroftes et Westefeld et in quibuscumque locis campis seu culturis parochie de Merston ex parte occidentali dicte uie regie que ducit de Ouerscelton usque ad Driepelingge prout est supra plenius designata sine contradictione seu clameo dictorum prioris et conuentus seu suorum quorumcumque successorum exceptis decimis quas uicarius de Wutton ex ordinatione domini Linc episcopi percipit et percipere consueuit in occidentali parte uie regie memorate ita quod non liceat alterutri partium predictarum ultra uiam predictam uersus alterutram partium transire in ipsius preiuditium pro decimis colligendis aut in ipsis decimis contra formam huius conuentionis de cetero quicquam iuris uendicare Et ad omnia premissa sine dolo et fraude fideliter obseruanda inposterum et in testimonium premissorum partes predicte presenti scripture cyrographate sigilla sua alternatim apposuerunt Hiis testibus dominis Rogero de Scelt Michele de Gold et aliis

Source Fulltext: Cartulary of Newnham Priory. Joyce Godber. Bedfordshire Historical Records Society, V.43. Bedfordshire Historical Records Society. Bedford. 1963-1964.