In nomine patris et filii et spiritus sancti Amen Notum sit omnibus fidelibus quod ego Willelmus de Messendena concedo Danieli abbati eiusdemque successoribus fratribusque sub eis regulariter in eadem uilla degentibus ad abbatiam constituendam ecclesiam Messendenie cum omnibus decimis et terram in qua sunt edifitia canonicorum cum uirgultis et pratis et ceteris adiacentibus infra ambitum fossarum et sepium a uia Londoniensi usque ad ecclesiam et pratum quod est extra fossas secundum riuulum aque usque ad terram Ricardi archidiaconi et totam terram que est inter ecclesiam et terram Ricardi archidiaconi et terram Theobaldi que fuit Berengarii patris eius et quamdam diuisionem nemoris ab hac terra extentam usque ad terram Walteri de Bolebec secundum quod undique signata est Et confirmo donum illud quod fecit Walterus de Bolebec de terra quam a me tenebat Totam denique terram que est inter nemus meum et terram Ricardi archidiaconi Totam etiam terram Radulfi presbiteri tam in agris cultis quam in nemore quam Radulphus tenebit a canonicis quamdiu uixerit set post obitum eius erit in dominio ipsorum Ex altera parte uallis ultra uiam Londoniensem duodecim acras terre Et uirgatam unam terre Arnulphi presbiteri et duas particulas nemoris secundum quod signa posita sunt Preterea quindecim acras in tribus culturis meis in unaquaque uidelicet cultura quinque Nemus etiam tam ad hospitandum quam ad ignem et pasnagium quietum Has supradictas possessiones in terris in pratis in nemoribus et in omnibus consuetudinibus do eis concedente Hugone filio meo absolutas et quietas et liberas ab omni seruitio omni tempore sicut elemosinam Facta sunt hec anno dominice incarnationis mc xxx iij Testibus Ricardo archidiacono et ceteris Humfrido de Kenebell etc Walter de Hertenuella Pagan fratre eius etc Ingelramo de Heselbga

Source Fulltext: Cartulary of Missenden Abbey. J. G. Jenkins. Records Branch of the Buckinghamshire Archaeological Society, V.2. Records Branch of the Buckinghamshire Archaeological Society. Aylesbury. 1938.