Omnibus hoc scriptum uisuris uel audituris Rogerus de Quency comes Wynton[] constabularius Scocie salutem Quia abbas de Wardon recognouit nobis quod tenentes sui quos habet in duobus mesuagiis in uilla de Eynesbury que quidem mesuagia habuit ex dono antecessorum nostrorum debent nobis et heredibus nostris sectam ad uisum franciplegii bis in anno uolumus et concedimus caritatis intuitu quod dictus abbas et successores sui quieti sint de secta uisus franciplegii ita tamen quod tenentes dicti abbatis et successorum suorum ueniant bis in anno ad uisum franciplegii ad faciendum quod secundum legem terre et consuetudinem regni facere debent Uerumptamen pro salute anime nostre et animabus antecessorum et successorum nostrorum concedimus pro nobis et heredibus nostris quod si dicti tenentes amerciati fuerint uel debeant amerciari pro aliqua transgressione uisum franci plegii tangente dictus abbas et successores sui illud amerciatum habebunt et percipient per manus proprias uel atturnatorum suorum a dictis tenentibus suis sine contradictione uel calumpnia nostri uel heredum nostrorum reddendo inde annuatim nobis et heredibus nostris unum denarium ad festum sancti Michaelis pro omnibus uisum franciplegii tangentibus Et ut hec nostra concessio robur perpetue firmitatis optineat presenti scripto sigillum nostrum apponi fecimus in testimonium Hiis testibus domino Roberto de Quency fratre meo Henrico Engayne Philippo Luuel Johanne de Cranford Petro Potar Petro de Syresham senescallo nostro Bryano clerico Henrico de Faffinton et Roberto Leonard Datum apud Sutho die Mercurii proxima post festum sancti Ambrosii anno gracie millesimo ducentesimo quinquagesimo secundo

Source Fulltext: Cartulary of the Priory of Old Wardon, Bedfordshire. G. H. Fowler. John Rylands Library, Manchester, Latin 223. Manchester University Press. Manchester. 1931.