sciant omnes ad quos presens scriptum peruenerit quod anno domini millesimo cc quinquagesimo quarto modo subscripto conuenit inter Iohannem de Chelebautone tunc magistrum Domus Dei de Suth et fratres eiusdem Domus ex una parte et Osbertum Sissorem ex altera uidelicet quod dicti magister et fratres concesserunt et dimiserunt dicto Osberto totum mesuagium illud cum suis pertinentiis quod de eorum feodo est et iacet inter domum Willelmi Speciar et domum quam Henricus Kute tenuit in uico francigeno in Suth habend et tenend eidem Osberto et heredibus suis et cuicumque illud dare uel assignare uoluerit exceptis religiosis ecclesiasticis et iudeis integre libere et quiete de dicta Domo Dei reddendo inde annuatim eidem Domui Dei sine difficultate qualibet ad festum sancti Michaelis xxi denarios et ad Natale xxi den et ad Pascha xxi den et ad festum sancti Iohannis Baptiste xxi den uidelicet quamdiu idem Osbertus et sui heredes uel sui assignati dictos septem solidos ut predictum est bene persoluerint et edificia in statu debito seruauerint competenter Et si contrauenerint aliqualiter licebit magistro et fratribus et successoribus suis dictum mesuagium ingredi cum suis pertinentiis et comodum suum inde facere sine omni impedimento dicti Osberti et heredum uel assignatorum suorum In cuius rei robur et testimonium huic scripto signa partium sunt appensa hinc inde alternatim Hiis testibus Waltero le Flemeng Benedicto Ace Radulpho Trefot Matheo Geyse Thurstano Heyrun Petro Thickeman et multis aliis

Source Fulltext: Cartulary of God's House. J. M. Keye. Southampton Record Series, V.19. Southampton University Press. Southampton. 1976.