sciant presentes et futuri quod anno domini millesimo ducentesimo quinquagesimo in festo sancti Iohannis Baptiste ita conuenit inter Iohannem de Chelebautone magistrum Domus Dei de Suthampton et fratres ac sorores eiusdem Domus ex una parte et Margeriam que fuit uxor Ricardi Simonis ex altera uidelicet quod dicti magister fratres et sorores concesserunt et dimiserunt dicte Margerie quandam terram cum edificiis que de feodo et elemosina dicte Domus Dei est in Suthampton in parrochia sancte Crucis quam Robertus li Changeur aliquando tenuit et que iacet inter mesuagium quod fuit dicti Ricardi Symonis uersus austrum et mesuagium quod fuit Walteri Golding uersus aquilonem et que habet in longitudine a strata regia uersus occidentem usque ad terram que fuit Walteri de Bello loco quam Iohannes de Glocestria tenet et terram Bartholomei Hay quadraginta et octo ulnas et dimidiam de ulnis ferreis domini regis Henrici tertii non interpositis pollicibus mensurantis et ubique in latitudine decem ulnas de eisdem integram et liberam ipsi Margerie et heredibus suis de carne sua procreatis seu procreandis et eiusmodi heredibus eorundem de predicta Domo Dei pro decem solidis annuis sterlingorum quieti redditus ad quatuor anni terminos eidem Domui Dei ibidem fideliter et sine difficultate qualibet persoluendis habend et tenend quamdiu scilicet eadem Margeria et heredes sui pretaxati predictum redditum decem solidorum ad terminos predictos ut predictum est persoluerint et edificia sine detrimento euidenti sustentauerint competenter pro omni seruicio ad dictam Domum Dei pertinente domini regis et alterius cuiuslibet semper et in omnibus iure saluo uidelicet ad festum sancti Michaelis duos solidos et sex denarios [etc] In cuius rei robur et testimonium signa dictorum magistri et Domus ex una parte et dicte Margerie ex altera huic scripto cyrographato hinc inde sunt appensa Hiis testibus dominis Waltero Flandrensi et Matheo Geyse tunc prepositis de Suthampton Willelmo Fortin Sansone de Puteo Thoma fratre suo Symone de la Bulehuse Thoma le Blund Ricardo le Breton tunc clerico curie Iohanne de la Prise et Willelmo Neue tunc seruientibus Sutht Roberto le Flemeng Tohanne de Glouernia et multis aliis

Source Fulltext: Cartulary of God's House. J. M. Keye. Southampton Record Series, V.19. Southampton University Press. Southampton. 1976.