Sciant presentes et futuri quod ita conuenit inter abbatem et conuentum sancti Jacobi de Northampton ex una parte et priorem et conuentum de Dauentre ex altera super decimis fenorum prati de Saunford quod est infra limites ecclesie de Watforde uidelicet quod predicti prior et conuentus de Dauentre soluent singulis annis dictis abbati et conuentui sancti Jacobi decem solidos argenti ad aduincula sancti Petri nomine decime fenorum predicti prati de Saunford ita quod predicti prior et conuentus de Dauentre soluti et quieti erunt inperpetuum erga predictos abbatem et conuentum sancti Jacobi a prestatione decimarum fenorum dicti prati de Saunford per solutionem dictorum decem solidorum ad predictum terminum sciendum uero est quod si fortasse dicti prior et conuentus de Dauentre a solucione predictorum decem solidorum prenominato termino cessauerint subiciunt se iuridictioni archidiaconi loci ut ipse omni appellatione et occasione cessante eas ad plenam satisfactionem ecclesiastica districcione compellat Facta est autem hec conuentio anno gracie millesimo ducentisimo tricesimo primo ad hanc uero conuencionem fideliter obseruandam tam fidei sacramentorum interueniente quam sigillorum suorum apposicione utraque pars se obligauit Hiis testibus Magistro Roberto de Mannecestre tunc archidiacono Northampton Magistro Stephano officiali fratre eius Almarico rectore ecclesie de Buccebroc Magistro Roberto de Ua et multis aliis

Source Fulltext: Cartulary of Daventry Priory. M. J. Franklin. Northamptonshire Record Society, V.35. Northamptonshire Record Society. Northampton. 1988.