In nomine patris et filii et spiritu sancti amen Nouerint uniuersi sancte matris ecclesie filii presens scriptum inspecturi quod pari uoto et communi assensu statutum est inter monasterium de Couentre et ecclesiam de Dauentre domino Willelmo Couintre priore et domino Nicholao priore de Dauentre ad utriusque conuentus instanciam et peticionem assentibus ut sese mutuo honore et oracionum suffragio affectuosius et specialius preueniant et in agendis suis mutuis inuicem consulendo et consolando diligentius et efficacius subueniant Ita ut si quis fratrum Couintre monasterii a priore suo consilio fratrum suorum apud Dauentre fuerit destinatus ibidem moraturus in uiceribus caritatis benigne a priore et conuentu de Dauentre suscipiatur regulariter et misericorditer tracetur et ordinem suum more Dauentree ecclesie sicut monachus eiusdem loci in omnibus consequatur donec a priore suo et conuentu reuocetur Si uero contigerit interim ipsum ibidem uitam finire omnia agenda de eo fiant et pro eo insuper et breuia mittentur sicut pro monacho de Dauentre Similiter si quis Dauentree ecclesie a priore eiusdem loci consilio fratrum suorum apud Couintre fuerit destinatus ibidem moraturus modo consimili suscipiatur tractetur et ordinem suum consequantur donec a priore suo et conuentu reuocetur Si uero interim contigerit ipsum ibidem uitam finire simili modo fiant omnia de eo et pro eo ut supradictum est et breuia similiter mittentur Si autem alibi aliquis eorum obierit uniusquisque sacerdos utriusque domus audito eius obitu huic inde tres missas celebrabit et suum seruicium cum placebo et dirige in conuentu habebit et eodem die corrodium monachile et nomen eius in martilogio scribetur Cum autem dicti priores et eorum successores uitam finirent fiet pro eis huic inde unum tricennale in conuentu preter cetera specialia beneficia que superius enumerantur Monachi uero inferioris ordinis quod ad eos pertinet plenarie persoluent Singulis autem annis una missa de spiritu sancto pro unius utriusque ecclesie celebrabitur et una pro defunctis In omnibus quoque aliis rebus spiritualibus seu temporabilibus si alterno se contigerat auxilio uel consilio indigere benigne ac fauorabiliter secundum deum auxilium et consilium efficax sibi ad inuicem exibebunt Et ut hec societas et familiaritas rata et inconcussa in posterum perserueret huic inde sigillorum utriusque capituli inpressione roboratur

Source Fulltext: Cartulary of Daventry Priory. M. J. Franklin. Northamptonshire Record Society, V.35. Northamptonshire Record Society. Northampton. 1988.