Uniuersis sancte matris ecclesie filiis ad quos presens scriptum peruenerit prior de Bernewell et cancellarius et decanus de Cantebrigia Elyensis diocesis salutem in domino Mandatum domini pape suscepimus in hec verba [...] Huius auctoritate mandati cum aliquantulum in causa esset coram nobis legitime processum tandem prefatus prior de Anglesee in iudicio comparuit a suo conuentu specialiter per litteras procuratorias datus legitime ad agendum et componendum super decimis de dominicis de Bodingsam quas idem prior et procurator ad ipsum et suum conventum iure communi et parochiali pertinere asserunt et a priore et conuentu de Longauilla iniuste detentas esse dicebat Prenominati vero prior et conventus de Longavilla sui presentacionem coram nobis in iudicio exibuerunt per magistrum Radulfum fratrem procuratorem ab eis specialiter constitutum ad defendendum et componendum super eisdem decimis prout in litteris procuratoriis utriusque partis continetur que mutuo penes partes remanserunt Auctoritate igitur nostra mediante inter prenominatos procuratores lis super predictis decimis amicabiliter conquievit per compositionem in hunc modum videlicet quod prefatus Radulfus procurator de assensu et voluntate prioris et conventus de Longavilla omnes decimas quas in parochia de Bodekesam aliquo tempore possederunt uel receperunt per se vel per alios vel in quibus aliquod ius ante tempus huius compositionis habuerunt prefatis priori et canonicis de Anglesee et eorum successoribus iure perpetuo concessit possidendas et ipsos in corporalem illarum possessi onem induxerunt possessionem quam in hiis habuerunt et retinuerunt per Geraldum filium Andree cui decimas illas ante compositionem istam contulerant qui eas nomine eorum possedit et qui vii marcas annuas eisdem nomine illarum decimarum soluit transferendo et assignando solutionem predictam ipsis priori et canonicis de Anglesee a predicto Geraldo de cetero esse faciendam ita quod post decessum dicti Geraldi uel ut alio quocumque modo idem Geraldus decimas ipsas desinat percipere ipsas integre et perpetuo prior et conuentus de Anglesee percipiant et possideant Prefatus prior et procurator de Anglesee canonicorum priori et conuentui de Longavilla et eorum successoribus pro bono pacis et concessione predictarum decimarum soluent annuatim centum solidos sterlingorum ad duos anni terminos sub pena unius marce pro cuiuslibet termini solutionis cessatione medietatem ad Penthecosten et medietatem ad festum sancti Michaelis ita quod predicto Geraldo superstite existente non nisi septem marcas annuas ad eosdem terminos persoluent prior et canonici de Anglesee priori et monachis de Longavilla sed eodem Geraldo viam universe carnis ingresso fiet integre solutio centum solidorum sub forma predicta Et ne ista compositio processu temporis in irritum possit devocari nos presenti scripto in modum cyrographi confecto una cum sigillis partium sigilla nostra apposuimus unum tradi discernentes monachis de Longavilla et alterum canonicis de Anglesee vices nostras ordinario loci committentes auctoritate eadem qua fungimur quatinus partem renitentem si quam in futurum fore contigerit per censuram ecclesiasticam sine lite compellere possit ad satisfaciendum Facta autem fuit hec composicio in ecclesia sancte Marie in Cantebrigia iiii Idus Iunii anno primo pontificatus domini Gregorii Pape noni hiis testibus

Source Fulltext: Newington Longeville Charters. H. E. Salter. Oxfordshire Record Society, V.3. Oxfordshire Record Society. Oxford. 1921.