Uniuersis sancte matris ecclesie filiis ad quos presens scriptum peruenerit Rogerus de Huntingefeld filius Willelmi de Huntingefeld salutem in domino Noueritis ita conuenisse inter me ex una parte et Willelmum priorem sancte Fidis de Longauilla et eiusdem loci conuentum ex altera quod quocienscumque ecclesie de Herlenton uacare contigerit ego et heredes mei clericum nostrum idoneum dicto priori uel procuratori suo qui apud Newton in Angliam moram faciet presentabimus et dictus prior uel procurator suus eundem clericum eis presentatum sine fraude et dilatione domino Elyensi episcopo presentabunt et si ita contingat quod procurator dictorum prioris et conuentus infra tres menses post uacationem dicte ecclesie apud Newenton inuentus non fuerit uel quod deus auertat malitiose absentauerit licebat michi et heredibus meis clericum nostrum ad dictam ecclesiam dicto Elyensi episcopo presentare ea uice ita quod nec ego Rogerus nec heredes mei aliquem presentabimus clericum antequam tres menses post uacationem dicte ecclesie fuerint elapsi Conuenit etiam inter me et priorem et conuentum quod si post uacationem dicte ecclesie ego Rogerus et heredes mei clericum nostrum dicto priori uel procuratori suo malitiose presentare distulerimus dilatio predicta nullum eis preiuditium generabit Preterea si aliquando contigerit procuratorem dictorum prioris et conuentus uacante ecclesia per tres menses abesse ita quod presentatio ad me uel ad heredes meos ea uice esset deuoluta iterato uacante dicta ecclesia ius dictorum prioris et conuentus presentandi clericum nostrum eis presentatum infra terminum prenominatum eis integre conseruetur Promisi etiam ego dictus Rogerus pro me et heredibus meis bona fide quod clericus qui ad dictam ecclesiam cum uacauerit erit presentatus inspectis sacrosanctis iurabit quod terminis statutis pensionem suam dictis priori et conuentui uel procuratori eorum fideliter persoluet et quod de decimis de dominico quas habent ibi dicti monachi ad antiquo eos non inquietabit nec molestabit Remiserunt etiam dicti monachi et quietum clamauerunt michi et heredibus meis pro se et successoribus suis omnes demandas questiones et actiones si quas habuerunt erga me uel predecessores meos absolute Ut autem hec mea concessio perpetuum robur obtineat nec tractu temporis possit obfuscari presens scriptum sigilli mei appositione roboraui Datum apud Cantebrigiam anno regis Henrici filii Iohannis xx

Source Fulltext: Newington Longeville Charters. H. E. Salter. Oxfordshire Record Society, V.3. Oxfordshire Record Society. Oxford. 1921.