permissione diuina abbas monasterii de Bardeneya Linc[] diocesis executor in hac pane mandati apostolici deputatus venerabilibus viris et discretis dominis archidiaconis uel eorundem officialibus vniuersis per dictam diocesim constitutis salutem in eo quem peperit uterus virginalis Litteras sanctissimi patris nostri domini Honorii papa iiij recepimus formam et tenorem continentes de uerbo ad uerbum inferius annotatos Honorius episcopus seruus seruorum etc Harum igitur auctoritate litterarum vobis in uirtute obediencie qua sedi apostolice tenemini firmiter iniungendo mandamus quatinus quilibet vestrum in singulis ecclesiis parochialibus sui archidiaconatus diebus dominicis et festiuis infra missarum solempnia post lecta ewangelia indicto districtius interim parochianis et ceteris tunc presentibus silencio omnes et singulos huiusmodi decimarum reddituum censuum legatorum instrumentorum publicorum terrarum domorum pratorum pascuarum nemorum molendinorum possessionum necnon bonorum aliorum ad ecclesiam Linc[] spectantium antedictam temere et maliciose detentores occultos per locorum capellanos publice moneri faciat ut citra festum Assumpcionis beate virginis premissa qua decano et capitulo memoratis debentur ab ipsis reuelent et restituere non omittant ac eciam de premissis plenariam prout iustum fuerit eis satisfactionem impendant Qui si sic moniti id efficere non curauerint prefigat ex tunc nichilominus ex habundanti palam et expresse eisdem detentoribus occultis in genere festum exultacionis[] sancte Crucis tunc proximo futurum pro termino peremptorio vt infra dictum festum prefatis decano et capitulo plenarie satisfaciant in hac parte alioquin in ipsos maioris excommunicacionis sentenciam publice et sollempniter pulsatis campanis candelis accensis in singulis ecclesiis archidiaconatus sui singulis diebus dominicis et festiuis intra missarum sollempnia silencio tunc presentibus sicut premittitur imposito promulgari faciat generalem quousque iidem detentores occulti premissorum ad cor reuersi beneficium absolutionis a nobis forma iuris exinde meruerint optinere aliudque super hoc ex parte nostra receperitis in mandatis Et quid in premissis feceritis nobis seu pocius dictis decano et capitulo distincte et aperte litteris vestris patentibus harum seriem continentibus vna cum nominibus eorundem de quibus per famam seu rei euidenciam vel alio modo legittimo nobis constiterit in hac parte citra festum Omnium Sanctorum significare curetis Valete semper in Christo Ihesu et virgine gloriosa Dat[] apud Bardeneyam iiij nonas Iulii anno domini mcc octogesimo sexto

Source Fulltext: The Registrum Antiquissimum of the Cathedral Church of Lincoln. C. W. Foster. Lincoln Record Society, V.27. Lincoln Record Society. Hereford Times. Hereford. 1931.