Anno regni regis Henrici filii Regis Johannis l sexto die lune proxima ante festum sancti michaelis prior et conuentus de Dunmawe per fratres Ricardum de Wyham et Robertum de Langedune attornatos eorundem et Nicholaus dictus Wymer de licencia senescalli illustris uiri Comitis Glouernie sub pena xl solidorum predicto Comiti ab ipso qui contrauenerit soluendorum de communa pastura in prato que uocatur Estmed in Salinge magna et omnibus aliis controuersijs arbitrio magistri Ricardi Gosfeld Ricardi de Bassingeburne Ricardi Walram Walteri Clerici dicti le pape alte et basse spontanea uoluntate se supposuerunt Qui quidem sub forma subscripta ordinauerunt Nos dicti r[icardus] r[icardus] r[icardus] et Walterus arbitri consideramus super communa pastura inter priorem de dunmawe ex parte una et Nicholaum Wymer ex altera quod prior de dunmawe et sui successores habeant in perpetuum sine molestia et contradictione dicti Nicholai uel Alicie ex parte sua vi bestias qualescumque predictus prior uoluerit exceptis porcis et capris in illa communa tempore aperto in prato de estmed Super uero omnibus aliis articulis et contentionibus hucusque habitis consideramus concorditer quod Nicholaus predictus acquietabit predictum priorem in Curia domini Comitis Glouernie et plegios suos similiter et predictus prior dabit dicto Nicholao x solidos sterlingorum et etiam aquietabit dictum Nicholaum in curia Christianitatis et dictus prior impetrabit absolutionem ipsius Nicholai si necessarie fuerit Et quod Nicholaus reddat predicto priori aueria sua per ipsum Nicholaum capta cum coreis aueriorum mortuorum In cuius rei testimonium presentibus una cum partibus sigilla nostra apposuimus Datum apud Berdefeld magna die et anno supradicto

Source Fulltext: Cartulary of Little Dunmowe Priory. British Library, Harley Ms. 662. Archaeologia Cantiana, V.10. Kent Archaeological Society. 1876.