Sciant praesentes et futuri quod nos Johannes Dei gratia Abbas Rameseiae et ejusdem loci conventus concessimus et obligamus nos ecclesiam nostram et successores nostros Rogero de Nortone pro uno mesuagio centum sexaginta et decem acris terrae decem et octo acris prati quae idem Rogerus dedit nobis in Houghtone et Wytthone per licentiam domini Regis et per cartam suam de feoffamento quod nos et successores nostri inveniemus unum capellanum divina singulis diebus in ecclesia Sancti Benedicti de Rameseia pro anima ipsius Rogeri et animabus patris matris et antecessorum suorum celebraturum imperpetuum ad altare Sancti Nicholai Similiter obligamus nos et successores nostros ad solvendum annuatim eidem capellano et successoribus suis sexaginta et decem solidos sterlingorum pro servitio suo ad duos anni terminos scilicet ad festum Sancti Michaelis triginta et quinque solidos et ad Pascha triginta et quinque solidos Et ad omnia ista fideliter facienda et observanda obligamus nos et successores nostros districtioni coercioni Episcopi Lincolniensis qui pro tempore fuerit si in aliquo conventionis praedictae defecerimus quod absit quod ipse nos et successores nostros possit compellere per censuram ecclesiasticam ad omnia praedicta facienda et observanda In cujus rei testimonium huic praesenti scripto sigilla nostra aposuimus Datum in capitulo nostro Ramesiae die Mercurii in vigilia Sancti Andreae anno regni Regis Edwardi filii Regis Edwardi primo

Source Fulltext: Cartularium monasterii de Rameseia. W. H. Hart and P. A. Lyons. Rerum Britannicarum Medii Aevi Scriptores, 79. Kraus. Nendeln. 1965.