In Dei nomine Amen Anno ab incarnatione ejusdem secundum cursum et computationem ecclesiae Anglicanae m ccc sexto Indictione quarta die vicesima secunda mensis Septembris Dominus Johannes de Ardern Rector ecclesiae de Etton Eboracensis dyocoeseos constitutus personaliter in Capitulo ecclesiae Beati Johannis Beverlacensis dictae dyocoeseos coram Domino Johanne de Risindon Auditore causarum capituli ibidem pro tribunali sedente concessit fideliter pro bono pacis se fore restiturum decimam garbarum cujusdam loci qui vocatur Gares de bovata terrae quae quondam fuit Willelmi Thurstan de Suthdalton in territorio de Etton Domino Alano de Humbelton custode operis ecclesiae Sancti Johannis praedicti asserente se esse in possessione perceptionis ejusdem decimae nomine operis supradicti a tempore cujus memoria non existit asportatam per ministros dicti Rectoris in autumno proximo elapso licet idem Rector decimam sic asportatam tempore asportationis ad ecclesiam suam praedictam mero jure pertinere credidit ut asseruit bona fide Dictusque Rector status sui reformationem petens ad cautelam si in aliquam sententiam excommunicationis generalem vel specialem incidisset occasione dictae decimae sic asportatae praestito ab eodem Rectore juramento de parendo mandatis ecclesiae absolutus fuit a praedicto Auditore si in aliquam excommunicationis sententiam de qua superius sit mentio aliqualiter incidisset Qui quidem Auditor injunxit eidem Rectori in virtute praestiti sacramenti quod Domino Alano praedicto decimam restituat plenarie praelibatam citra diem dominicum proximo sequentem sub poena excommunicationis majoris in eadem instantia judicii in personam suam latae si dicto die dominico cessaret aliqualiter in restitutione decimae supradictae et quod de cetero dictam decimam non asportet nec asportare faciat nisi per viam juridicam licite valeat asportare jure tamen ejusdem Rectoris in petitorio sibi salvo Acta omnia haec in Capitulo supradicto sub anno indictione die et mense praenotatis praesentibus Magistris Alano de Cotum Radulpho de Anlagheby et Roberto de Scoureburgh Ricardo filio Sabineri Radulpho de Langtoft clericis testibus ad praemissa vocatis specialiter et rogatis Et ego Johannes Chammpeneys de Eboraco clericus Eboracensis dyocoeseos auctoritate imperiali notarius publicus praemissis omnibus praesens interfui eaque manu mea scripsi et in hanc publicam formam redegi signoque meo consueto roboravi rogatus

Source Fulltext: Memorials of Beverley Minster. The Chapter Act Book of the Collegiate Church of St. John of Beverley, A.D. 1286-1347. A. F. Leach. Surtees Society, V.98. Surtees Society. Andrews & Co. London. 1897.