Acta in Capitulo ij Kalendas Octobris Anno Domini millesimo ccc sexto coram Domino Johanne de Risindon Auditore ejusdem Magister Robertus de Byham Cancellarius hujus ecclesiae coram nobis Auditore praedicto personaliter comparuit et Magistrum Rogerum de Bolton ad scolas gram[m]aticales Beverlacenses ad suam praesentationem et collationem spectantes praesentavit cujus praesentationis tenor talis est Praesentatio Venerabili Capitulo ecclesiae Beati Johannis Beverlacensis Robertus de Byham ejusdem ecclesiae Cancellarius Salutem in eo qui est causa vera salutis Quia scolas Beverlacenses grammaticales nunc vacantes ad meam collationem spectantes Magistro Rogero de Bolton ad triennium regendas contulimus cum proventibus earumdem caritatis amore quod et vestrae dominationi notum facimus per praesentes Unde quod vestrum erit ulterius juxta consuetudines Ecclesiae praedictae antiquas et approbandas in eodem facias cum effectu Valeat dominatio vestra reverenda nunc et per tempora feliciter successiva Datis apud Beverlacum in crastino Sancti Michaelis anno Domini millesimo ccc sexto Collatio Tenor collationis dictarum scolarum dicto Rogero factae Robertus de Byham ecclesiae Beati Johannis Beverlacensis Cancellarius Dilecto sibi in Christo Magistro Rogero de Bolton Salutem in Domino Tuae probitatis et discretionis merita prosequi volentes favore speciali tibi scolas Beverlacenses nunc vacantes et ad collationem nostram spectantes ad triennium regendas conferimus caritatis amore In cujus rei testimonium sigillum nostrum de voluntate nostra praesentibus est appositum Datis Beverlaci ij Kalendas Octobris Anno Domini millesimo ccc sexto Ad haec dictus Rogerus quasdam litteras testimoniales de conversatione sua in scolis sigillo communi Universitatis Cantabrigiae consignatas cujus tenor dinoscitur esse talis Littera Testimonialis de conversatione in scolis Universis sanctae matris ecclesiae filiis ad quorum notitiam seu audientiam litterae praesentes pervenerint Magister Ricardus de Aston vices venerandi viri Magistri Stephani de Segrave Universitatis Cantabrigiensis Cancellarii in ejus absentia gerens ejusdemque coetus unanimis magistrorum Salutem in amplexibus Salvatoris Vestra noverit Universitas Reverenda Magistrum Rogerum de Bolton in Universitate praedicta studiis insistendo in artibus liberalibus fideliter et utiliter sicuti effectus operum noscuntur manifestare rexisse et se bene et laudabiliter habuisse necnon vitam suam moralibus redimitam sic in melius continuasse ut dignorum testimonio laudabili merito debeat decorari Quocirca cum hiis quorum conversationem frequens fama commendat favor cum gratia debeatur Vestram Universitatem cum affectione qua possumus requirimus et rogamus quatinus divinae caritatis intuitu et precum nostrarum interventu ipsum Magistrum Rogerum gratia praeditum et nullius inquinamenti quod sciatur labe respersum cum ad vos venerit sicut vestram decet benevolentiam audientes eidem aures vestras dignemini favorabiliter inclinare super hiis quae pro se duxerit expedire ita ut exinde valeatis dignis in Domino laudibus merito commendari In cujus rei testimonium has litteras nostras sibi fieri fecimus patentes sigilli nostri communis munimine roboratas Datis Cantabrigiis in plena congregatione magistrorum Regentium die sabbati proximo post festum Apostolorum Petri et Pauli Anno Domini m ccc vi Quibus litteris lectis recitatis et plenius intellectis Nos Auditor praedictus ipsum Magistrum Rogerum ad regimen dictarum scolarum cum omnibus honeribus suis nomine dicti capituli ad praesentationem dicti Magistri Roberti duximus admittendum qui taliter admissus corporale sacramentum tactis sacrosanctis evangeliis praestitit in hac forma Ego Rogerus ero fidelis et obediens Capitulo Beati Johannis Beverlacensis ejusque ministris in canonicis et licitis mandatis scolas mihi commissas fideliter regam et per fideles et idoneos ministros regi faciam ac omnia alia et singula mihi occasione dictarum scolarum quibuscunque incumbentia fideliter faciam et etiam observabo pro posse meo prout istius ecclesiae et scolarum praedictarum laudabiles consuetudines et etiam approbatae exigunt et requirunt sic Deus me adjuvet et sacrosancta evangelia Dei Quibus actis ipsum Rogerum in possessionem corporalem dictarum scolarum per Alanum de Humbelton tunc temporis Magistrum Operis ecclesiae supradictae induci fecimus prout consuetudo ecclesiae nostrae exigit et requirit

Source Fulltext: Memorials of Beverley Minster. The Chapter Act Book of the Collegiate Church of St. John of Beverley, A.D. 1286-1347. A. F. Leach. Surtees Society, V.98. Surtees Society. Andrews & Co. London. 1897.