Universis praesens privilegium seu instrumentum publicum inspecturis Rogerus de Monte Florum Dei gratia Comes Palatinus Pacem eandem et salutem Sagax humanae naturae discretio memoriae hominum labilitate pensata ne diuturnitate temporum quae inter contrahentes aguntur oblivionis defectui subjacerent Tabellionatus adinvenit officium per quod contrahentium vota scribuntur Et scripturae ministerio postmodum longum servantur in aevum Cum itaque Ricardus Botemound de Sutton clericus Eboracensis Dyocoeseos in nostra praesentia constitutus nobis humiliter supplicavit ut sibi tabellionatus officium concedere dignaremur Nos ipsius Ricardi supplicationibus quem ad hujusmodi tabellionatus officium exercendum sufficientem et ydoneum esse reperimus in hac parte favorabiliter annuentes recepto prius ab eodem Ricardo sacrosanctae Romanae ecclesiae ac sacri Romani imperii nomine fidelitatis solitae necnon etiam ab ipso tabellionatus officium fideliter et legaliter exercendi corporaliter juramento praedicto Ricardo auctoritate nobis in hac parte et antecessoribus nostris a divis imperatoribus super conficiendis notariis seu tabellionibus publicis concessa praefatum tabellionatus officium duximus concedendum ac ipsum Ricardum de eo per pennam calamarium atque cartam quae tunc in manibus nostris tenebamus praesentialiter investivimus ipsumque ad pacis osculum recepimus Dantes et concedentes eidem Ricardo dicta auctoritate nobis ut superius exprimitur in hac parte concessa plenam licentiam tenore praesentium et liberam potestatem instrumenta acta prothocolla conficiendi et litteras exemplandi copiandi et publicandi testes recipiendi examinandi et eorum dicta publicandi testamenta et codicillos conficiendi confessiones super quibuscunque contractibus audiendi et recipiendi ac insumandi et scribendi ultimas decedentium voluntates et quaelibet alia instrumenta scripturas sive contractus tam ultimarum voluntatum quam quorumcunque aliorum negotiorum scribendi publicandi examinandi necnon etiam sententias judicum ordinariorum delegatorum et arbitrorum audiendi et etiam formandi appellationes exceptiones quascunque tam in judiciis quam extra conficiendi et ordinandi cum potestate dandi tutores et curatores decreta interponendi alimenta decernendi Necnon emancipare manumittere et adoptare volentibus auctoritatem praestandi officium judicis ordinarii exercendi Et de praemissis omnibus et eorum singulis coram quibuscunque judicibus tam ecclesiasticis quam secularibus plenam fidem faciendi dictumque Tabellionatus officium ubilibet et ubicunque terrarum libere prudenter et fideliter exercendi ac omnia alia et singula faciendi quae ad saepedictum officium quomodolibet spectare noscuntur vel etiam pertinere Et ad praedictum Ricardum cum necesse fuerit in omnibus et singulis supradictis et quae ad praemissum officium spectant libere curratur In quorum omnium testimonium et certitudinem pleniorem praesens privilegium seu instrumentum publicum fieri et publicari mandavimus per Stephanum del Clottes de Jarum Notarium publicum infrascriptum et sigilli nostri fecimus appensione muniri Datum et actum Lugduni in claustro fratrum minorum anno nativitatis Domini millesimo ccc sexto indictione quarta vicesimo quinto die mensis Decembris Pontificatus sanctissimi Patris Domini Clementis Papae quinti anno primo praesentibus discretis viris Johanne Sparu de Jarum clerico Eboracensis dyocoeseos et Simone de Feriby clerico Lincolniensis dyocoeseos testibus ad praemissa vocatis specialiter et rogatis Et ego Stephanus del Clottes de Jarum clericus Eboracensis diocoeseos publicus sacri Romani imperii auctoritate notarius concessioni ac investiturae dicti tabellionatus officii factis dicto Ricardo per Comitem Palatinum supradictum una cum testibus supradictis praemissis omnibus et singulis praesens interfui signavi et nomine roboravi rogatus

Source Fulltext: Memorials of Beverley Minster. The Chapter Act Book of the Collegiate Church of St. John of Beverley, A.D. 1286-1347. A. F. Leach. Surtees Society, V.98. Surtees Society. Andrews & Co. London. 1897.