Universis sanctae ecclesiae filiis hoc scriptum visuris vel audituris Magistri Thomas et Ruffinus de Notingham et de Cliveland Archidiaconi commissarii venerabilis patris W[alteri] Dei gratia Ebor[] Archiepiscopi Angliae primatis Salutem in Domino sempiternam Cum os bovis claudi non debeat triturantis nec temporalibus inhumaniter defraudari qui animabus egentibus cibum spiritualem catholicam doctrinam subministrat congruum judicamus atque dignum ut cui curam committimus parochialem ob praerogativam meritorum sic praefecto decens subsidium eidem cohaereat temporale ut pondus laboris levius subportetur et facilius sustineat ospitalitatem forinsecam quae incumbit Hinc est quod cum Venerabilis Pater memoratus super ordinatione seu taxatione portionis vicariae altaris Sancti Martini in ecclesia prebendali Beverlacensi cum capella Sanctae Mariae ad idem altare pertinente de consensu Magistri Gilberti de Sancto Leoffardo titulo canonici praebendae ejusdem loci cujus eadem altare et capella portiones esse praebendales dinoscuntur et insuper in possessionem et inductionem vicarii ejusdem altaris nobis commiserit nuper totaliter vices suas Portionibus subscriptis in suo valore ponderatis Intelleximus quod in parochia quae spectat ad dictum locum cum capella annualia trigintalia et legata sibi relicta et ceteri questus liciti seu proventus quadragesimales et annuales qui certo perceptionis titulo non clauduntur ad viginti marcas extenduntur Item denarius sibi seu suo sacerdoti ipsius vice in dictis altari seu capella celebranti offerendus ad minus valet quinque marcas Nos igitur portiones antedictas ab ejusdem loci vicario qui pro tempore fuerit percipiendas et decem marcas annuas de praebenda Canonici ejusdem per manum Canonici ad Pentecosten et ad festum Sancti Martini [h]yemalis per partes aequales ordinantes diffinimus et decernimus imperpetuum persolvendas et ad vicariam dicti altaris cum capella memorata portiones praemissas cum integritate decetero imperpetuum continentem ad praesentationem dicti Canonici vice Domini Archiepiscopi nobis fungentibus in hac parte nuper factam Dominum Rogerum de Rise capellanum virum providum competenter litteratum et honestum canonice admittimus et actualiter instituimus in praemissis et in possessionem ejusdem decernimus auctoritate praemissa irrevocabiliter inducendo Decernentes quod ipse et sui successores imperpetuum in dictis locis curam habeant animarum et onus spirituale quod incumbit reverenter subeant suis temporibus et devote Volumus etiam et ordinamus quod ille vicarius et ejusdem successores imperpetuum personaliter et honeste deserviat parochiae tam loci matricis [ecclesiae] quam capellae idoneorum presbyterorum et clericorum numero condecenti qui etiam cum suis presbyteris intererit in habitu regulari processionibus praebendalis ecclesiae diebus Dominicis et festivis Qui etiam fidelitatem et canonicam obedientiam jurabit dicto Canonico coram nobis et idem juramentum ab ejusdem vicarii successoribus canonicis ejusdem loci qui pro tempore fuerint perpetuo praestandum ordinamus Et ut in hoc omnia rata sint et firma praesens scriptum in modum cirograffi indentatum sigillorum nostrorum et etiam Magistri Gilberti de Sancto Leoffardo canonici dicti loci et Domini Rogeri superscripti alternatim appensorum munimine duximus irrevocabiliter roborandum Datum et actum Ebor[] x Kalendas Januarii Anno Domini m cc sexagesimo nono

Source Fulltext: Memorials of Beverley Minster. The Chapter Act Book of the Collegiate Church of St. John of Beverley, A.D. 1286-1347. A. F. Leach. Surtees Society, V.98. Surtees Society. Andrews & Co. London. 1897.