Sciant praesentes et futuri quod ego Robertus de Pykering canonicus et praebendarius prebendae Sancti Petri in ecclesia S[ancti] Johannis Beverlacensis in Beverlaco Dedi concessi assignavi et hac praesenti carta mea confirmavi Capitulo dictae ecclesiae [etc.] et successoribus suis octo choppas cum pertinentiis in Beverlaco per me in solo praebendae meae praedictae ibidem de novo constructas jacentes in longitudine a terra praebendae S[anctae] Katerinae usque ad terram praebendae S[anctae] Mariae in ecclesia antedicta et in latitudine inter altam viam Beverlaci quae vocatur Fismarketegat et murum situatum in terra praebendae meae antedictae pro divisione terrae dictarum schopparum et terrae ejusdem praebendae Ad inveniendum unum capellanum divina singulis diebus in praedicta ecclesia celebraturum imperpetuum pro mei et venerabilis patris Domini Willelmi de Grenefeld Dei gratia Eboracensis Archiepiscopi Angliae primatis ac Magistri Willelmi de Pykering Archidiaconi Notingham fratris mei germani statu salubri et animabus patris mei matris meae Adae fratris mei et Ceciliae sororis meae et antecessorum et successorum meorum ac Archiepiscoporum Canonicorum Eboracensium et Beverlacensium ecclesiarum et omnium Christi fidelium defunctorum ac post mortem nostram pro animabus nostris et omnibus animabus supradictis Tenendum et habendum praedictas octo choppas cum omnibus pertinentiis suis libertatibus et aisiamentis ac etiam cum omni jurisdictione temporali in personis inhabitantibus dictas choppas dicto Capitulo et successoribus suis libere quiete bene et in pace imperpetuum Salvis mihi et successoribus meis in praebenda antedicta spirituali jurisdictione oblationibus decimis personalibus et aliis obventionibus quibuscumque dictarum personarum ad jus parochiale pertinentibus quovismodo Praedictum autem Capitulum et successores sui per magistrum operis ecclesiae memoratae dictas octo choppas sufficienter sustentabunt et quinque marcas argenti annuatim ad festum S[ancti] Martini in hyeme et ad Pentecosten per aequales partes de firma dictarum viij chopparum exeuntes per manus ejusdem magistri operis capellano ut praemittitur singulis diebus celebraturo reddent et persolvent imperpetuum Residuum vero firmae antedictae deductis sustentatione et quinque marcis praedictis in commodum dicti operis imperpetuum convertentur Praesentatio siquidem hujusmodi capellani dum praebendam tenuero antedictam ad me pertineat postmodum vero collatio ejusdem cantariae quotiens vacaverit ad Capitulum pertineat antedictum Et volo quod idem capellanus quicunque pro tempore fuerit statim post matutinas dictas in choro ecclesiae ejusdem ad altare dictae Praebendae S[ancti] Petri celebret cotidie nisi infirmitate vel alia causa rationabili eum contigerit impediri et tunc per alium capellanum ydoneum faciat eisdem loco et tempore celebrari in modo suprascripto ac plenum servitium pro mortuis videlicet placebo dirige et commendationem singulis dicat diebus principalibus festis ejusdem ecclesiae duntaxat exceptis ac processionibus intersit in habitu necnon vesperis matutinis et missis festorum duplicium ecclesiae praelibatae Super quorum observatione fideli in sua admissione jurare corporaliter teneatur In cujus rei testimonium sigillum meum praesentibus est appositum Datis apud Brantyngham undecimo die mensis Maii A[nno] D[omini] millesimo ccc septimo Hiis testibus Thoma le Hyrde Willelmo de Barton Johanne de Celar[io] Radulpho Rousyng Willelmo de Tenelby Roberto de Willardby Johanne Pistore Racero Laurence Ricardo de Kyrkeby Petro de Sutton Elia scriptore et aliis

Source Fulltext: Memorials of Beverley Minster. The Chapter Act Book of the Collegiate Church of St. John of Beverley, A.D. 1286-1347. A. F. Leach. Surtees Society, V.98. Surtees Society. Andrews & Co. London. 1897.