Pateat universis per praesentes quod ego Petrus Aymerici Canonicus ecclesiae Beati Johannis Beverlacensis Eboracensis dyocoeseos facio et constituo procuratorem meum Rogerum Peperwyt exhibitorem praesentium ad colligendum percipiendum et levandum fructus redditus et proventus vendendum et alias distrahendum et ad firmam seu assensam tradendum et aliter de eisdem prout sibi videbitur disponendum ita tamen quod juste et licite fiat quod in praemissis fieri contigerit per eundem Necnon et ad custodiendum domos terras et alia bona mobilia et immobilia ad dictam praebendam pertinentia quoquo modo item ad petendum exigendum et recipiendum omnia et singula debita et alia bona quaecumque ratione dictae praebendae vel ex quacumque alia causa mihi debentur et debitoribus quibuscumque seu a quibuscumque detentatoribus detinentur et litteras solutionis et acquietationis meo nomine concedendum et omnia et singula faciendum in praemissis et ea tangentibus quae ego facere possem si personaliter interessem Ratum et actum habiturus quicquid per dictum procuratorem factum fuerit in praemissis In cujus rei testimonium sigillum meum est appensum Datis Cantuariae iij die Januarii A[nno] D[omini] m ccc septimo

Source Fulltext: Memorials of Beverley Minster. The Chapter Act Book of the Collegiate Church of St. John of Beverley, A.D. 1286-1347. A. F. Leach. Surtees Society, V.98. Surtees Society. Andrews & Co. London. 1897.