Quarto Kalendas Julii anno m ccc nono Dominus Marmaducus de Tweng comparuit in Capitulo Beati Johannis Beverlacensis Magistris Waltero de Glovernia Roberto de Pykering Henrico de Carlton Johanne de Nassington et Domino Johanne de Dynigton canonicis tunc ipsum Capitulum repraesententibus recognovit se tenere de dicto Capitulo manerium suum de Holm in parochia de Leven cum omnibus suis pertinentiis pro homagio suo reddendo inde annuatim dicto Capitulo j marcam in die Nativitatis Sancti Johannis Baptistae pro omnimodis secularibus servitiis etc prout in carta quam inde habet plenius continetur Qui quidem Dominus Marmaducus facta recognitione praemissa fecit homagium suum in manu Magistri Roberti de Pykering ad hoc per ipsum Capitulum specialiter deputati in forma debita et etiam consueta factoque homagio suo Dominus Marmaducus tactis evangeliis eidem Capitulo fidelitatis debitum et consuetum praestitit juramentum Quibus peractis idem Marmaducus coram praedicti Capituli causarum Auditore comparuit et flexis genibus a sententia excommunicationis quater in anno in ecclesia Beati Johannis Beverlacensis promulgata si in eam incideret ob detentionem annui redditus unius marcae eidem Capitulo pro dicto manerio debiti et per ipsum per sex annos et amplius jam detenti humiliter petiit se absolvi Idem vero Auditor audita petitione praedicti Marmaduci de praecepto Magistri Johannis de Nassington canonici ipsum in forma juris quantum ad ipsum attinebat absolvebat eidemque in virtute praestiti juramenti injunxit quod de cetero dictum annuum redditum statuto termino fideliter persolvat ac poenitentiam eidem pro dicta offensa infligendam usque alias reservavit

Source Fulltext: Memorials of Beverley Minster. The Chapter Act Book of the Collegiate Church of St. John of Beverley, A.D. 1286-1347. A. F. Leach. Surtees Society, V.98. Surtees Society. Andrews & Co. London. 1897.