Universis presentes literas inspecturis vel audituris Ricardus de Abyndon[] rector ecclesie sancti Sampsonis de Crickelade Sarum diocesis salutem in omnium Salvatore Cum contencio inter me ex parte una et religiosos viros abbatem et conventum Cirencestr[] ecclesiam de Latton[] eiusdem diocesis in proprios usus habentes ex parte altera super decima feni provenienti de prato quod vocatur Russhy et aliis querimoniis querelis et causis quam asserui ad me pertinere et ecclesiam meam antedictam eo quod pratum illud est infra limites parochie ecclesie mee antedicte constitutos dictis religiosis contrarium asserentibus et pretendentibus dictum pratum fore infra limites parochie ecclesie sue de Latton[] antedicte et ipsum pratum fore dotalicium dicte ecclesie de Latton[] et eciam ipsos decimam dicti prati nec aliorum immobilium que propriis manibus coluerunt se solvere non debere prout a sede apostolica eis fuit indultum tandem inspectis ipsorum munimentis per que apparebat dictum pratum fore dotalicium dicte ecclesie de Latton[] et ipsos decimam solvere non debere de hiis que propriis manibus coluerunt ipsos religiosos super dicta decima inquietare cessavi et infuturum cessabo omni modam accionem quam habeo vel habere potero racione proprietatis seu possessionis in dicta decima seu querimonium et querelam causarum supra dictarum eisdem religiosis et eorum ministris quibuscumque remitto pure sponte et absolute pro me et successoribus meis imperpetuum In cuius rei testimonium sigillum meum presentibus duxi apponendum Dat[] London[] die dominica post festum sancti Johannis Baptiste anno Domini millesimo ccc sexto

Source Fulltext: The Cartulary of Cirencester Abbey, Gloucestershire. C. D. Ross. Oxford University Press. London. 1964.