Universis Christi fidelibus praesentes litteras inspecturis vel audituris w[alterus] divina miseratione Wygorniensis ecclesiae minister humilis salutem in Domino sempiternam Cum inter viros religiosos abbatem et conventum Sancti Petri Gloucestriae actores ex parte una et priores et fratres Hospitalis Jerosolomitani in Anglia reos ex altera super spoliatione duarum marcarum annuae pensionis quas dicti abbas et conventus a praedictis hospitalariis nomine ecclesiae de Quenintone solere percipere proponebant orta fuisset materia quaestionis et procuratores partium specialem ad hac habentes potestatem post varios inter easdem coram diversis judicibus processus habitos dominos suos nostrae in hac parte ordinationi sive arbitrio submiserint tam super jure quam possessione pensionis praedictae necnon et arreragiis a tempore quo dicti hospitalarii pensionem eandem dictis religiosis subtraxisse dicuntur prout in instrumento super hoc confecto et sigilli nostri munimine roborato plenius continetur cujus tenor talis est Memorandum quod cum inter viros religiosos abbatem et conventum Sancti Petri Gloucestriae ordinis Sancti Benedicti Wygorniensis dyoecesis ex parte una et priorem et fratres hospitalis Jerosolomitani in Anglia ex altera super spoliatione duarum marcarum annuae pensionis de ecclesia de Quenintone ejusdem dyoecesis suborta fuisset materia quaestionis ac partibus coram officiali venerabilis patris domini Wygorniensis episcopi ordinario jure cognoscente aliquamdiu litigantibus a praefatis abbate et conventu mere possessorium judicium intentantibus et restitui petentibus pars dictorum hospitalariorum excipiendo proposuit quod coram dicto officiali respondere non debebant cum a jurisdictione ordinaria auctoritate Sedis Apostolicae cui immediate subjecti sunt in omnibus causis tam realibus quam personalibus undecunque subortis sint prorsus exempti ita ut non nisi coram domino Papa vel ab eo judice delegato teneantur respondere quod ut asserebant per exhibitionem privilegii a domino Papa sibi concessi et eidem officiali in judicium exhibiti evidenter constabat Et quia idem officialis ipsos ut dicebant super hoc audire recusabat reputans insuper ipsos contumaces cum non essent in unam marcam argenti ipsos perperam condemnavit eorum procurator legitimus sentiens dominos suos indebite praegravari dominum Papam ad tuitionem sedem Cantuariensem ut asserebant appellavit Et demum partibus in praesentia decani de Arcubus Londoniensis officialis curiae Cantuariensis commissarii generalis in causa tuitionis praedicta cognoscentis per procuratores legitime constitutos et speciale mandatum habentes sufficienter comparentibus et praefatam tuitionis causam aliquamdiu agitantibus tandem inter eosdem lis conquievit in hunc modum videlicet quod pars dictorum hospitalariorum firmiter ac bona fide promisit quod citra Pascha proximo futurum dictis abbati et conventui anni praesentis duarum marcarum praedictam restitueret pensionem et submiserunt se partes praedictae venerabili patri domino Wygorniensi episcopo in quem tanquam in ordinatorem pure et absolute consenserunt et ejusdem ordinationi seu arbitrio tam super jure quam possessione pensionis praedictae necnon super caeterorum arreragiorum restitutione se penitus submiserunt ita quod idem venerabilis pater summatim et de plano sine strepitu judiciali super praemissis cognoscens pronunciet ordinet seu arbitretur super eisdem prout secundum Domini et justitiam ac secundum jura et rationes partium viderit expedire Cujus ordinationem seu arbitrium partes bona fide ac sacramento in animas dominorum suorum a procuratoribus praestito promiserunt firmiter observare submittentes dominos suos in hac parte coertioni praedicti domini episcopi quod possit partes praefatas ad observationem omnium et singulorum quae praemissa sunt per quamcunque coertionem ecclesiasticam sine strepitu judiciali compellere renunciantes in hac parte exceptioni cavillationi appellationi impetratis et impetrandis et omni tam juris civilis quam canonici remedio partibus in contrarium competenti seu competituro salvis in omnibus aliis causis et negotiis praedictis priori et fratribus privilegii sibi a Sede Apostolica concessis Et cum praedictus dominus episcopus in suam veniens dyoecesim ibidem contraxerit moram diebus et locis ab eodem partibus praefigendis comparebunt partes antedictae cum omnibus rationibus juribus et munimentis suis ejusdem domini episcopi ordinationem seu arbitrium devote suscepturae In quorum omnium testimonium idem venerabilis pater qui in se suscepit onus praedictum decanus de Arcubus Londoniae et procuratores partium habentes potestatem specialem subiciendi dominos suos ordinationi seu arbitrio domini episcopi supradicti praesentibus signa apposuerunt Datum Londoniae die Sabbati proxima post festum Sanctae Scolasticae Virginis anno Domini millesimo ducentesimo quinquagesimo nono Nos Walterus divina permissione Wygorniensis episcopus auditis plenius et intellectis partium rationibus et eisdem diligenter examinatis communicato virorum prudentum nobis assidentium consilio Deum habentes prae oculis in nomine Patris et Filii et Spiritus Sancti Amen sic pronunciamus et ordinamus quod dicti hospitalarii in perpetuum decaetero dictis abbati et conventui dictam pensionem duarum marcarum annuatim nomine ecclesiae de Quenintone absque omni contradictione persolvant hiis terminis scilicet in festo Annunciationis Dominicae unam marcam et in festo Sancti Michaelis unam marcam Super arreragiis vero pensionis praedictae jam dudum per dictos hospitalarios preafatis abbati et conventui restituant antedictis Reservantes nobis potestatem in posterum partes praenotatas ad hujus nostrae ordinationis observantiam quotiens opus fuerit compellendi Acta sunt haec apud Gloucestriam partibus praefatis per procuratores sufficientes coram nobis comparentibus et praemissae ordinationi expresse consentientibus in crastino Beati Hyllarii anno Domini millesimo ducentesimo sexagesimo

Source Fulltext: Historia et Cartularium Monasterii Sancti Petri Gloucestriae. William Henry Hart. Rerum Britannicarum Medii Aevi Scriptores, 33 P.1. Longman, Green. Longman, Roberts and Green. London. 1863.