Omnibus Christi fidelibus ad quos praesens scriptum pervenerit J prior de Lanthonia juxta Gloucestriam et m[auricius] archidiaconus Gloucestriae et magister R officialis domini Wygorniensis salutem in Domino Mandatum domini Papae in haec verba suscepimus [...] Hujus igitur auctoritate mandati priorissa et monialibus de Ancrewic ad instantiam dicti W rectoris ecclesiae de Langeleia legitime citatis ut coram nobis comparerent intentione dicti W fundata contra dictas moniales super omnibus decimis de assarto de Prestewike et omnibus hominibus tenentibus de eodem assarto quae dicebat jure parochiali spectare ad ecclesiam suam de Langeleia Tandem citra litis contestationem lis in hunc modum conquievit videlicet quod saepedictus W nomine ecclesiae suae de Langeleia de caetero percipiet omnes decimas minores et obventiones et personales decimas provenientes de terris et hominibus dictis Omnes homines etiam dicti tam vivi quam mortui omni familia sua percipient in ecclesia de Langeleia omnia sacramenta tam necessaria quam voluntaria Dictae autem moniales integre percipient decimas garbarum de dicto assarto solvendo singulis annis dicto W nomine ecclesiae de Langeleia novem solidos ad duos terminos scilicet ad Annunciationem Beatae Mariae quatuor solidos et sex denarios et ad festum Beati Petri quod dicitur ad Vincula quatuor solidos et sex denarios Si autem praefatae moniales praedictos novem solidos praefatis terminis non solverint saepedictus W sine contradictione integre percipiet decimas garbarum de dicto assarto quousque dictae moniales de praefata pecunia eidem satisfecerint Si autem de caetero contingat assartum jam dictum ampliari vel alibi novum oriatur ecclesia de Langeleia integre percipiet omnes decimas portionis super excrescentis et cujuslibet novi assarti Capella autem de Alreburne cum antiquis pertinentiis et antiquis libertatibus remanebit in statu in quo fuit ante dictam assartationem ita tamen quod capellanus qui pro tempore celebrabit in capella de Alreburne nullum de parochianis de Langeleia neque de Prestewic admittet ad sacramenta vel sacramentalia in damnum et praejudicium ecclesiae de Langeleia Servientes autem monialium qui pro tempore fuerint apud Alreburne accedent tribus festis solennibus scilicet ad Natale Domini ad Pascha et ad Assumptionem Beatae Mariae ad ecclesiam de Langeleia facturi more aliorum parochianorum Facta est autem haec compositio anno ab Incarnatione Domini millesimo ducentesimo vicesimo quarto mense Octobris Et ut in posterum compositio valeat et permaneat sigilla nostra cum sigillis partium alternatim apposuimus

Source Fulltext: Historia et Cartularium Monasterii Sancti Petri Gloucestriae. William Henry Hart. Rerum Britannicarum Medii Aevi Scriptores, 33 P.1. Longman, Green. Longman, Roberts and Green. London. 1863.