Haec est conventio facta anno Domini millesimo ducentesimo septuagesimo septimo dominica post festum Sancti Oswaldi regis et martyris inter Walterum le Sevare burgensem Gloucestriae ex parte una et viros religiosos abbatem et conventum Sancti Petri de eadem ex altera videlicet quod praedictus Walterus sacramento corporaliter praestito se praedictis religiosis obligavit quod fidelis eorum creditor existet quamdiu vixerit et quantumcunque necesse ad expendendum in domo sua et in maneriis suis habuit de quolibet genere piscis ad manus dicti Walteri qualitercunque ex empto venientis in Gloecestria et extra ubicunque aliquem piscem poterit perquirere sufficienter inveniet singulis diebus vitae suae sub eodem foro et pretio quo ipse vel sui illum piscem poterunt emere seu comparare et nullum lucrum ex emptione a praedictis religiosis recepturus Promisit insuper bona fide praedictus Walterus quod providentiam faciet ad opus dictorum religiosorum de quolibet genere piscium tempore suo quo major fuerit de illo pisce abundantia et melius forum ut de anguillis suo tempore de luciis et aliis piscibus suis temporibus et eosdem faciet bene custodiri quousque dicti religiosi ipsis indiguerint pro eodem pretio pro quo eos primo comparavit liberandos eosdem cum voluerint Et si aliquem piscem penes se tanto tempore retinuerit vel retineri fecerit quod nec possit nec debeat vendi eodem pretio quo emebatur si ipso pisce indigeant dicti religiosi tantum dabunt pro eodem quantum tunc valebit vel quantum alii essent daturi et non amplius Et si contingat quod dicti religiosi piscem salsum vel alium in villa Gloucestriae voluerint emere alium forte quam habuerit idem Walterus ad manus tunc idem Walterus cum emptoribus dictorum religiosorum adibit ipsos qui hujusmodi piscem habuerint ad vendendum meliori foro quo poterit dictum piscem ad opus dictorum religiosorum mercaturus non tamen nisi voluerit praedicto pisce pacaturus Dicti autem religiosi totam pecuniam quam idem Walterus expenderit in emptione ad opus eorum facta ut supradictum est eidem solvent quatuor terminis anni sine ulteriori dilatione videlicet in festo Sancti Michaelis singulis annis sive in quindena in festo Nativitatis Dominicae seu in quindena in festo Paschae seu in quindena in Nativitate Sancti Johannis Baptistae seu in quindena prout per dicam inter ipsum Walterum et coquinarium dictorum religiosorum de pretio emptionis piscis factam singulis praedictis terminis poterit liquere Si vero alterutra pars contra istam conventionem aliquo tempore qualicunque modo indebite venerit et hoc per fidedignos probari poterit illa pars quae fidem in parte vel in toto non observaverit parti alteri pro qualibet transgressione quadraginta solidos nomine poenae persolvet Ut autem praefatus Walterus fidelis ipsorum religiosorum creditor existat prout superius dictum est omni fraude seu simulatione remota praedicti religiosi molendinum suum quod vocatur Budelesmulne cum pertinentiis suis quod aestimatur per annum ad sex marcas praefato Waltero concesserunt tenend de eisdem ad vitam suam secundum formam et tenorem cujusdam cartae eidem inde confectae Praeterea gratiose concesserunt fidem religiosi praefato Waltero unam robam annuatim ab eisdem recipiendam de pretio viginti solidorum quamdiu fidelis eorum creditor ut supradictum est extiterit In cujus rei testimonium etc

Source Fulltext: Historia et Cartularium Monasterii Sancti Petri Gloucestriae. William Henry Hart. Rerum Britannicarum Medii Aevi Scriptores, 33 P.1. Longman, Green. Longman, Roberts and Green. London. 1863.