Omnibus Christi fidelibus ad quos praesens scriptum pervenerit Alicia divine miseratione Wyltonensis abbatissa et ejusdem loci conventus salutem in Domino Ut ea quae a majoribus seu fundatoribus nostris pie laudabiliter et provida deliberatione ad ampliandum cultum Dei sunt statuta necnon per successum temporis longissimi etiam cujus non extat memoria ab iis qui et quae nos praecesserunt diligenter et inviolabiliter sunt observata plena in posterum gaudeant firmitate et integritate prompta sollicitudine et promptitudine sollicita curare nos decet intendere et procurare eapropter praebendam de Sub Nyweton quam Henricus capellanus noster ex praesentatione nostra canonice est assecutus volumus et unanimiter consentimus et quantum in nobis est statuimus pristina in posterum libertate dignitate jure integritate et possessione tam in capite ejus praescripto quam in membris ejus subscriptis in perpetuum sine cujuslibet contradictione uti et gaudere pacifice quae scilicet membra sunt haec decimae de dominico de Stokes et viii solidi pro decimis de dominico nostro de Avena solvendi praedicto Henrico et successoribus suis sine aliqua difficultate in perpetuum singulis annis a decano et capitulo Sarum per manus communariorum qui pro tempore fuerint apud Sarum in festo Sancti Mariae Magdalenae item decimae de villa nostra de Uggeford Sancti Johannis decimae de dominico abbatissae de Cadamo apud Tidolveshyde xv acrae inbladatae singulis annis de dominico Berewyk Sancti Jacobi et decimae de dominico de Wykford Majori statuentes nihilominus quod dictus Henricus et successores sui qui pro tempore eidem praefuerint nomine ipsius praebendae consimili gaudeant libertate dignitate jure integritate et possessione tam in capite quam in membris ipsius praebendae jam praenominatis et in omnibus aliis pertinentiis suis ab antiquo ad dictam praebendam pertinentibus Quod ne in futuris temporibus vacillet sed firmo robore inconcussum perseveret concedimus et praesenti scripto confirmamus cui etiam ad majorem securitatem sigilla nostra fecimus apponi His testibus magistro Henrico Tessun domino Johanne de Redeclive capellanis nostris Thoma nunc decano Wyltoniensi Waltero persona de Semele Marciano persona de Wyly Johanne [filio] Alani Benedicto de Cantaria Rogero janitore Reginaldo clerico et aliis

Source Fulltext: Charters and Documents Illustrating the Cathedral, City and Diocese of Salisbury. Dunn McCray. Rerum Britannicarum Medii Aevi Scriptores, 97. H.M.S.O. Eyre and Spottiswoode. London. 1891.