Omnibus Christi fidelibus praesens scriptum visuris vel audituris Willelmus [de Eboraco] Dei gratia Sarum episcopus salutem in Domino Cum Johannes eadem gratia abbas S Petri de Filgeriis ordinis S Augustini Redonensis dioceseos procurator capituli sui liberam habens et generalem potestatem ordinandi et disponendi super omnibus rebus dictae domus ecclesiasticis sive saecularibus in partibus Angliae constitutis pro se et capitulo suo pure et absolute super omnibus quae ad ipsos ratione ecclesiae de West Kyngton pertinebant in qua jus obtinebant patronatus annuum redditum ab ipsa ecclesia percipiendo nostrae se subjecit ordinationi Nos paupertati ipsius domus compatientes et expensis vexationibus gravaminibusque eorundem quae eisdem annuatim pro dicto redditu innuebant ipsis super hoc quibusdam necessariis sibi destitutis volentes paterna occurrere pietate de consilio et assensu capituli nostri sic duximus ordinandum ut dicti abbas et conventus singulis annis a rectore ipsius ecclesiae qui pro tempore fuerit centum solidos nomine simplicis beneficii ad duos anni terminos percipiant videlicet ad festum S Michaelis quinquaginta solidos et ad festum Paschae quinquaginta solidos jure patronatus ipsius ecclesiae penes nos et successores nostros Sarum episcopos perpetuo remanente ita quod dicti abbas et conventus in dicta ecclesia vel occasione ipsius ecclesiae nihil amplius quam dictos centum solidos aliquibus temporibus sibi poterint vendicare Caeteris omnibus quae dicti abbas et conventus quocunque modo in dicta parochia seu de dicta ecclesia percipiebant vel quae ad dictam ecclesiam pertinere noscuntur vel in futuro poterunt pertinere ad rectorem cui dicta ecclesia per nos vel successores nostros futuris temporibus fuerit collata pertinebunt ad cujus etiam pecuniae solutionem supradictis terminis faciendam statuimus ut rector cui dicta ecclesia per nos vel successores nostrae caritative fuerit collate statim post institutionem suam corporale praebeat juramentum Et ut major ipsi monasterio paretur securitas ipsum rectorem per privationem ipsius beneficii tanquam perjurum ad eam solutionem ut supradictum est fideliter faciendam compelli volumus et coarctari Qui quidem rector omnia onera ipsius ecclesiae ordinaria debita et consueta suis sumptibus sustinebit Et ut haec nostra ordinatio futuris temporibus robur obtineat firmitatis duo super hac ordinatione in modum cyrographi fecimus instrumenta quorum unum sigillo nostro signatum penes abbatem et conventum dicti monasterii reliquum vero sigillo dicti abbatis signatum una cum literis suae procurationis ad perpetuam rei memoriam in thesauraria Sarum residebit Facta est autem haec ordinatio apud Sarum die sabbati proxima ante Cineres anno Domini m cc xlviii His testibus magistro Egidio [de Wocumb] archidiacono Berksyre domino Nicholao [de Capella] archidiacono Sarum magistro Rogero de la Grene et aliis In horum omnium testimonium et fidem sigillum capituli nostri huic instrumento apponi procuravimus

Source Fulltext: Charters and Documents Illustrating the Cathedral, City and Diocese of Salisbury. Dunn McCray. Rerum Britannicarum Medii Aevi Scriptores, 97. H.M.S.O. Eyre and Spottiswoode. London. 1891.