Noverint omnes praesens scriptum visuri vel audituri quod ego Robertus de Hertford decanus Sarum in caritate et prosperitate vitae meae constitutus de quinque marcis quas mihi debent abbatissa et conventus de Wiltone annuatim et in perpetuum sicut patet in carta illarum obligatoria inter me et illas super hoc confecta et publicata sic ordinavi videlicet quod post mortem meam communarius Sarum qui pro tempore fuerit recipiet dictas quinque marcas ad duos anni terminos videlicet ad Pascha et ad festum S Michaelis qui duo termini continentur in carta praenominata et illas distribuet de voluntate decani et subdecani Sarum qui pro tempore fuerint in modo subscripto videlicet quod aliquis vicarius Sarum capellanus honestae conversationis et approbatae fidelitatis percipiet annuatim xl solidos ad celebrandum annuale pro anima mea et omnium benefactorum meorum et omnium canonicorum Sarum et omnium fidelium defunctorum in missa et commendatione et Placebo et Dirige Et ego per Dei gratiam providebo ante mortem de primo sacerdote qui dictum annuale celebrabit Decanus autem et subdecanus Sarum qui pro tempore fuerint providebunt de aliis capellanis vicariis scilicet Sarum successive et in perpetuum qui omnes jurabunt quod integre et fideliter annuale commissum in forma praedicta in suo tempore celebrabunt Lego autem marcam communae Sarum et canonicis residentibus in perpetuum annuatim recipiendam ut ipsi memoriam habeant de me post mortem meam in orationibus et suffragiis suis et aliis beneficiis De quinta autem marca sic ordino quod in die obitus mei annuatim in perpetuum succedendo recipiet quilibet canonicus Sarum qui servitio interfuerit tres denarios et quilibet vicarius Sarum unum denarium et quilibet altarista unum obolum pueri autem chori sex denarios residui autem denarii distribuentur Fratribus Minoribus Sarum et Fratribus Praedicatoribus de Wiltone pro aequali portione dividendi prout se volunt [valent p] extendere Datum Sarum in crastino S Ambrosii episcopi et confessoris anno Domini m cc lvi

Source Fulltext: Charters and Documents Illustrating the Cathedral, City and Diocese of Salisbury. Dunn McCray. Rerum Britannicarum Medii Aevi Scriptores, 97. H.M.S.O. Eyre and Spottiswoode. London. 1891.