Omnibus sanctae matris ecclesiae filiis ad quos praesens scriptum pervenerit Robertus de Wychampton miseratione divina Sarum episcopus salutem in Domino sempiternam Honores et beneficia quae de decanatu ecclesiae Sarum recepimus de cujus bonis dum curam decanatus ejusdem gessimus diu viximus velut filius pendens ad ubera matris attendentes dignum merito arbitramur ut aliquid gratito eidem decanatui pro receptis ab eodem beneficiis recompensare debeamus Ea propter cum decani qui pro tempore fuerint ad perpetuam residentiam in ecclesia faciendam ex statuto ejusdem specialiter sunt astricti nec domos seu mansionem aliquem hactenus habuerint decanatui appropriatam quam inhabitare possent huic incommodo prospicere et decanatum ipsum in hoc honorare cupientes domos nostras in clauso Sarum quae in officio decanatus constituti inhabitare consuevimus eidem decanatui et decanis qui pro tempore fuerint assignamus concedimus et donamus in perpetuum In cujus rei testimonium praesentes literas impressione sigilli nostri fecimus communiri Datum per manum domini J de Leycestre canonici Sarum et cancellarii nostri apud Rammesbire v kal Novembris anno Domini m cc lxxvii pontificatus nostri anno quarto

Source Fulltext: Charters and Documents Illustrating the Cathedral, City and Diocese of Salisbury. Dunn McCray. Rerum Britannicarum Medii Aevi Scriptores, 97. H.M.S.O. Eyre and Spottiswoode. London. 1891.